Shillong, Lber, 29: Ki nongseng skul kiba don hapoh ka shatri jong ka Meghalaya School welfare Development Association (MSWDA) Central Body ki la rai ban sa phah shen da ka jingthoh sha ka Sorkar Jylla ba kan ai jingithuh ia ki skul ba la seng da ki misioneri bad ki kynhun shimet kum ki Non-Government Institution.
“Ha ka taiew ban sa wan ngin sa ai da ka jingthoh sha ka Sorkar Jylla halor kane ka jingai jingmut,” la ong u President jong ka Association u Bah HM Marbaniang ha ka jingiakren bad ki lad pathai khubor hadien ba la wai ka jingialang kaba la long ha Khasi National Dorbar Hall Mawkhar ha ka sngi Saitjaiñ.
“Ngi la iakren ia ka jingpynryntih ia ki skul baroh naduh Pre-Primary haduh Higher Secondary hadien ba ngi la iohi ia ka jingthmu ban pynbeit ryntih ia ki skul katkum ka polisi ia kaba la sdang ban leh sorjamin lyngba ki CRC,” la pyntip u Bah Marbaniang.
“Katba dang iaid ka jingsorjamin ngi kwah ban ai jingmut ia ka sorkar ban ithuh noh ia ki skul ba la seng da ki mishon, ki NGO kum ki Non Government Institution. Ngi sngewdei ruh ban tyrwa ia ka Sorkar ba kan ai jingrarap ia ki nonghikai jong ngi kaba iaryngkat ha ki skul Non Government Institution khnang ba kan long kaba ryntih bad ban khanglad ia ka jingiehnoh shiteng por jong ki nonghikai ia ka kam,” ula ong bad bynrap, “ngi kwah ba ka sorkar kan iarap ban siew tulop da ka Scale, kata, tang ka Basic bad ka DA khnang ba ki nonghikai kim donkam shuh ban mih sha surok ban dawa.”
“Ngi kwah ruh ia ka Sorkar ban pyntreikam ia ka polisi ba la mynjur bad ym dei ban shu shna khlem da pyntreikam,” u la ong.
U Bah Marbaniang, u la ong ruh ba ka MSWDA ka kwah ban ai jingmut ia ka Sorkar ba kan iohi ia ki jingeh jong ka pule ka puthi naduh ki nongkyndong katkum ka jingdon jong ki nonghikai bad ki khynnah hapoh ki skul. “Ngi kwah ba ka Sorkar kan thung nonghikai uwei shi klas naduh Pre-Primary khnang ban pynbha ia ka pule puthi namarba tangda ka bor jong ka Managing Commitee kam lah,” u la bynrap.
U la kynthoh ruh ba ki don ki skul kiba ki khynnah ki pas ia ka eksamin Matrik 80-90 percent manla u snem kim ioh jingiarap katba ki don pat ki skul ki bym don satia ki khynnah kiba pas ia ka eksamin Matrik ki ioh jingiarap.
Halor ka bor pyniaid skul, katkum ba la pruiddak ha ka Meghalaya State Education Policy, 2018 u Bah Marbaniang ula ong, “wat ki jingiarap ne ka School Grant kaba T.10 hajar ne 25 hajar tang shisien shi snem ia kata ruh kim ai shuh sha ka SMC hynrei la ai sha ki Vendor ne Supplier. Kane ka jingiarap kam lah ban bei ia ki jinglut namarba la hap ban bei ia ki jinglut na ka skul.”
Shuh shuh u la ong ba ka seng ka kyrpad ia ka Sorkar ban ai jingiarap ia ki Secondary Section namarba lada ym iarap da ka Sorkar kan shem jingeh ia ki bor pyniaid skul wat ban siew tulop ia ki nonghikai.
Halor ka jingai jinghikai pyntbit ia ki nonghikai kiba la don lypa ha ka kam, u Bah Marbaniang u la ong, “ngi kwah ba ka Sorkar kan plie lad ia ki ban pyndep ia ka B.Ed namarba bun ki dei kiba la pyndep ia ka D.El.Ed. Wat ia ki nonghikai ki bym pat pyndep ia ka D.El.Ed ngi kwah ba ka Sorkar kan plie lad na ka bynta jong ki.”
