Shillong, Naitung, 30: Ka Congress kaba shong ha ka Liang Pyrshah ka la duh noh ïa u MLA ba khatduh bad ba marwei jong ka hadien ba u MLA ka Mylliem u Bah Ronnie V. Lyngdoh u la pynïasoh sha ka National People’s Party (NPP) ha ka sngi Balang.
Da ka jingphet noh jong u Bah Ronnie ka Congress mynta kam don MLA shuh ha ka Ingdorbar Thawaiñ ka jylla kaba don 60 ngut ki dkhot.
U Bah Ronnie u la pynpaw ba dei ka jingkwah jong ki nongkyrshan bad ki nongïalam jong u ban shim ïa kane ka rai.
U Lamphang ka Iingdorbar Thawaiñ u Thomas A Sangma u la pdiang ïa ka shithi jinglong dkhot ha ka Congress jong u Bah Ronnie bad kum u Opposition Whief Whip bad u la ithuh ïa u kum u dkhot ka NPP hadien ba u la aiti ïa ka shithi iehnoh kam bad ban pynpaw ïa ka jingangnud ban pynïasoh bad ka NPP.
Ïa u Bah Ronnie la synran lang da u Symbud Myntri Rangbah ka Jylla u Bah Sniawbhalang Dhar, ki bahaing hasem bad ki nongïalam jong ka party.
Ha ka jingïakren bad ki lad pathai khubor, u Bah Ronnie u la ong, “ki nongkyrshan jong nga, ki nongïalam jong nga ki shimkhia ïa kiei kiei baroh ha kaba ïadei bad ka jinglong jingman ha ka jylla, ki la kyrpad ïa nga ban pyrkhat biang ïa ka jingïadei jong nga bad ka Indian National Congress (INC) bad na ka bynta ka jingmyntoi jong ki paidbah ka thaiñ, ki la kyrpad ïa nga ban pyrkhat biang ïa ka jingïadei jong nga bad ka INC.”
“Kam don eiei kaba bakla ha ka Congress. Hynrei nangta ngi la don san ngut ki MLA na uwei u la shah jied kum u MP jong ka Tura bad lai ngut ki la mih noh na ka party. Nga la sah marwei. Kumta nangta ki paidbah ki la ong na ka bynta ka jingmyntoi jong ka Constituncy phi pyrkhat biang ïa ka kyrdan jong phi kum u MLA jong ka Congress bad hadien ba la shong bad ki ka la shim por katto katne bnai ban pyrkhat ïa kane bad khatduh la shim ïa ka rai ban ïasoh sha ka NPP na ka bynta ka jingmyntoi jong ka Constituency bad ban pynbiang ïa ka jingkhmihlynti bad ki jingangnud jong ki paidbah,” u la bynrap.
U Bah Ronnie u la pynksan ba ka seng Congress ka dang don haduh mynta, watla kam don shuh ki MLA ha ka iingdorbar thawaiñ. U la pyni ïa ka jingïasyriem bad kiwei pat ki seng saiñpyrthei, kum ka KHNAM, kiba dang ïai bteng ban treikam kum ki seng saiñpyrthei khlem ki MLA.”
U la pynpaw ba baroh ki nongïalam bad ki nongkyrshan jong u ki la ïasnohkti lang bad ka rai jong u ban rung sha ka NPP. U la ai burom ïa ka jingïalam jong u Myntri Rangbah ka jylla ban pynïaid ïa ki kam pynroi ha ka jylla bad pynpaw ïa ka jingsngewnguh ïa ki paidbah kiba la ai ka jingkyrshan.
U la kyntait ruh ba ka don kano kano ka jingbuh kyndon shwa ba un leit ban pynïasoh bad ka NPP.
Halor ka jingkylli hato ka don kano kano ka jingpynbeit hapdeng jong u bad u MLA barim u Bah Hamletson Dohling, u Bah Ronnie u la ong, “kam kam shym la don satia ha ka jingmut jong nga namar lada don ar snem shiteng ka kam jong nga ka long ban trei na ka bynta ka Constituency bad ki paidbah bad na ka bynta kata ngin sa hap ban jam lyngba ïa ka jingkieng ynda la dei ka por.”
Haba kylli halor ka jingthmu jong u na ka bynta ka jingpynkhreh ïa ka elekshon 2028, u Bah Ronnie u la ong ba ka shong ha ka rai jong ka NPP ha kaba ïadei bad ka bynta jong u ha ka party.
Halor kawei pat ka jingkylli hato u President ka Congress u Vincent H Pala um shym la lah ban ïalam ïa ka party, u Bah u la ong, “ngi long kiba don jingïadei bha la ka long shimet bad ha ka saiñpyrthei hynrei ha kaba ïadei bad ka kyrdan jong u ka shong ha ki bor bahalor ban shim rai halor kata. Ngam dei uei uei ruh ban rai ïa ka kyrdan jong u.”
Haba kylli hato u la don neem ka jingïamir jingmut bad u Bah Pala shuwa ban iehnoh ïa ka Congress, u MLA ka Mylliem u la ong, “phi ïohi ba nga kit ram ha ki briew jong nga namar dei ki paidbah kiba la jied ïa nga. U dei u khlieh jong ka seng hynrei kano kano ka rai kaba nga shim ka long na ka bynta ka jingmyntoi jong ki paidbah, jong ki paidbah bad ïa ki paidbah.”
