Shillong, Lber, 04: Ka FKJGP, Khliehriat Circle ha ka sngi Baar ka la dawa ia u Deputy Commissioner jong ka East Jaiñtia Hills District ba um dei satia ban ai jingbit ïa ki nongshong die madan ban buh dukan ha phyllaw jong ka DC Office ha Khliehriat.
Ha ka shithi ba la soi da u President Bah Michal Chyrmang bad u General Secretary Bah Justme sana, ka seng ka la pynpaw ba lada ki riewshimet kin ïoh ïa jingbit ban shong die jingdie hapoh phyllaw ka DC ophis ha Khliehriat kan pynlong ïa kane ka jaka kum ka jaka ïew bad kan wanrah ïa ka jingkhapngiah bad ka jingwit, ka jingthut ïa ki paidbah kiba leit donkam sha ka ophis u DC.
Ka seng ka la kren ïa kane ka mat hadien ba ki nongdie soh bad die umsoh ki la shong die jingdie ha ka phyllaw jong ka DC ophis.
Ka seng ka la pynpaw shuh shuh ba kane ka jaka ka dei ban pyndonkam beit tang na ka bynta ki kam Sorkar, ym da kawei pat ka rukom.
Ka seng ka la kyntu ïa u DC ba un sngap ïa kane ka jingkyrpad jong ka seng bad ruh ban leh kloi ïa kaba donkam.
