Nongpoh, Naitung 1 : Da ki spah ngut ki paidbah bad kynthup ki kali paidbah mynta ka sngi ki la sahkut ha ka surok na Bhoirymbong sha Kyrdem, ka dei hadien ba kawei ka Trok kaba kit ïa ka puhshilum (Excavator) ka la kylla bad ka la khanglad ïa ka ïaid ka ieng jong ki paidbah ka thaiñ Kyrdem ha Ri Bhoi District.
Kane ka jingjia ka la jia mynta ka sngi ka 1 tarik u Naitung 2023 ha ka por 12 baje mynsngi, ha kaba kawei ka trok kaba wan na ka thaiñ Kyrdem bad kaba kit ïa ka kali Puhshilum ka la kylla hajan kawei ka jingkieng ba la tip kum ka jingkieng Umket kaba don hajan ka wah Umtung bad da ka jingkylla kane ka trok ka la wanrah jingeh ïa ki paidbah ha ka leit ka wan ba kim lah shuh ban ïaid na katei ka surok ba la khanglad na ka jingkylla katei ka trok.
Katkum ki jingtip ba la ioh halor kane ka jingjia ym shym la don mano mano ba mynsaw bad lait noh ka jingshah ktah ki paidbah ha ka leit ka wan bad khamtam mynta ka sngi kaba dei ka sngi ïew Umroi, bun na ki paidbah kiba leit sha katei ka ïew ban siew ban tda na kane ka iew kaba shisien shi taiew ha ka thaiñ Umroi. Ki kali kamai ki la hap ban shu ïa kylliang ïa ki nongleit nongwan hadien ba ki kali kim lah shuh ban ïaid lyngba katei ka surok ba la khang sbak da katei ka trok kaba la kylla hapdeng surok.
Halor kane ka jingjia, ki bor pulit na Khapmara PIC tang mar ïa ioh jingtip ki la phah ïa ki bor pulit ban tohkit halor katei ka jingjia bad khamtam ban thaw ki lad ki lynti ban weng noh ïa katei ka trok na katei ka jaka.
