Shillong, Risaw, 31: Ki ïingsah baduk ba ka Sorkar ka la shna kyrpang ha ka dong Lumphira, Nongmensong, Shillong ban aiti ïa ki briew kiba hap hapoh u laiñ ka jingduk ne Below Poverty Line (BPL) ki la kylla long mynta kum ki ktem leh kam runar ruser jong ki riew shim kabu namarba haduh mynta ka Sorkar kam pat aiti satia ïa ki iing sha kiba dei hok ban ïoh.
Halor kane, ki nongïalam jong ka Federation of Khasi Jaiñtia and Garo Peoples (FKJG) Nongmensong Unit ha ka sngi Palei ki la aiti da ka dorkhas ha u Symbud Myntri Rangbah ka Jylla uba khmih ïa ka tnat Pynroi Sor u Bah Sniawbhalang Dhar ban aiti noh ïa ki iing sha ki longiing kiba duk.
Ha ka jingïakren bad ki lad pathai khubor, u General Secretary jong ka seng u samla Alan Kharkongor u la ong, ‘u Symbud Myntri Rangbah u la pyntip ba ladep pynkhreh ïa ka Detailed Project Report (DPR) nadong shadong bad ha u snem u ban sa wan yn sa pynïaid ïa ka kam shakhmat.”
“Lada ka jingkren jong u Symbud Myntri Rangbah kam urlong ha u snem ban sa wan, ka seng kan sa shim da ka sienjam kaba tyngeh,” ong u samla Alan Kharkongor.
U la ïathuh ba ïa ki iingsah ha Nongmensong ka Sorkar lyngba ka tnat Pynroi Sor ka ladep shna mynta la jan lai snem kynthih hynrei haduh mynta ym pat lah satia ban aiti sha kiba dei hok.
“Kine ki ïing mynta ki la kylla kum ki ktem leh kam sniew bad ngi la pyntip ha u Symbud Myntri Rangbah. Mynta kine ki ing, la hap ban maramot biang namarba bun na ki ing ki la sniew. Ka Sorkar ka la hap ban mang pisa biang ban maramot,” u la ong.
Haba kylli, ula ïathuh ba ki ing kiba ladep shna pura ki don 4 tylli bad baroh ki ing kiba shna ki long 64 tylli.
Shuh shuh ula ong ba u Myntri u la pyntip ba ka jingbym pat lah ban sam ïa ki ing ka long namarba ym pat don ka um bad ka bording.
“Ka jingeh ka long ïa ki nongshong shnong, namarba ngi ïohbat ïa ki riewshim kabu ban leh kam sniew hapoh kine ki ïing ba la shu ieh iingjah. Ngi la pynsngew ruh ha u MLA bad u la ong ba wat ma u ruh u kwah ba kane ka kam kan ïaid noh wut wut,” la ong u General Secretary ka FKJGP.
“Ka jingshna jong ka sorkar ïa kine ki ing kan long ka jingkyrkhu ïa kiba duk hynrei ka jingbym aiti sha kiba dei hok ban ïoh ki ing ki la kylla long kum ki ktem leh awria,” u la ong shuh shuh.
