Shillong, Lber, 21: Ka ‘lawbniap kaba don ha shilynter jong ka Bivar Road, kaba mih sha Saw Furlong Polo, Shillong ka kylla long ka ktem sah miet jong ki nongdie bad ki nongdih drok.
Ki Pulit jong ka Sadar Police Station kiba la ïoh jingtip halor kane, ha ka sngi Thohdieng ki la hiar khynra ïa kane ka ‘lawbniap bad ki la lap ïa ki iing tap shiliang ba la shu teh da ki jain bad ki platic.
Ha ka jingkhynra ki Pulit ki la lap ruh ïa ki thyrnia injekshon, ki waiar, ki jain ki nep, ki dawai kuli hynrei ym shym la lap pat ïa ki briew kiba sah ha kane ka jaka.
Ha kane kajuh ka sngi, ki Pulit ki la bat ïa ki lai ngut ki samla shynrang kiba dang shongkai ha kane ka ‘lawbniap bad hadien ba ladep kylli jingkylli ki la pyllait noh namarba kine ki samla ki la phla ba ki shu wan shongkai pyngngad hajan kane ka lawbniap kaba ki briew ki ju ïaid lynti manla ka sngi.
Hadien kane, ki Pulit ki la pynpra lut ïa kine ki iing tap shiliang bad rah lut ïa ki tum ki tam baroh ban pynkhuid ïa kane ka khlaw.
