Shillong, Risaw, 05: Ka Hill State People’s Democratic Party (HSPDP) ka la ai jingmut ba la donkam ban kyllum beit ïa ka 80 percent ha ka bhah thungkam thungkam na ka bynta ki Khasi, Jaiñtia bad Garo khnang ban wanrah ïa ka jingïakob kaba biang bad ka jingthungkam ka dei ban long katkum ka jingpas bha ha ka jingpule da kaba pynshong nongrim na ka Merit List ym shuh ha ka jingbun paid.
Hadien ba la aiti ïa ka jingai jingmut jong ka party sha ka Expert Committee on the State Reservation Policy, u General Secretary jong ka HSPDP u Bah Panbor Ryntathiang ha ka jingïakren bad ki lad pathai khubor u la ong, “ngi la banjur ïa ka jingdonkam ban khmih bniah ïa ka Reservation Policy kaba la pynmih ha ka 12 tarik, Kyllalyngkot 1972 khnang ban peit ïa ka jingkiew ha ka ïohkam ïohjam bad ban shimkhia ïa ki bynta bapher bapher ha ka imlang sahlang.”
“Ka party ka sngewdei ban pynïasoh lang ïa ka 40% + 40% kaba long 80% na ka bynta ki jaidbynriew Khasi-Jaiñtia bad Garo khnang ba kan don ka jingïakhun kaba khuid katkum ka jingpas bha hapdeng ki jaidbynriew Scheduled Tribe jong ka jylla, kata, ki Khasi-Jaiñtia bad ki Garo, bad ban khanglad ruh ïa ka jingshah pynduh lane ka jingshah bym hok ïa kano kano ka jaidbynriew,” ula ong.
U Bah Ryntathiang u la ong ha kaba ïadei bad ka Office Memorandum kaba 18 tarik, Nohprah, 1972…kaba kdew ïa ka bhah kyrpang ïa ki kam ba lait ha ka kyrdan District, ka party ka la ai jingmut ba dei ban ai jingmyntoi 90% ïa ki nongthep kam trai ri jong kano kano ka district ha ka jylla Meghalaya, da kaba buh jingmut ba ka jingpynrung kam ha rilum Khasi, rilum Jaiñtia ka dei ban long tang ïa kine ki ar jaitbynriew, kata ïa tang ki Khasi bad Jaiñtia, katba ki jingpynrung kam ha rilum Garo ka dei ban long tang ïa ki jaidbynriew Garo.
U la ïathuh ba ka party ka la ka la ai jingmut ruh ïa ka jingdonkam ban pynduh noh ïa ka rukom rah shakhmat haba kdew ïa ka Para 2 jong ka Resolution kaba ong, “lada don ka jingduna ha ka jingdon ki Scheduled Tribes bad Scheduled Castes yn rah shakhmat ha ka snem thungkam kaba bud bad yn leh bha ha ka jingthungkam jong kata ka snem lane ka bym palat ïa ka shisnem.”
Shuh shuh, u Bah Ryntathiang u la ong, “naduh ba la pynkha ïa ka jylla Meghalaya, ïa ka State Reservation Policy kaba 12 tarik, Kyllalyngkot, 1972, la pyntreikam ruh ïa ka percentage na ka bynta ban bhah ïa ki Seat ha ki liang bapher bapher jong ka pule ka puthi na ka bynta ki Khasi, Jaiñtia bad Garo khlem ki kyndon kiba shai ïa kaba ym shym la kdew shai ha ka Reservation Policy. Kumta, ka party ka sngew ba ka ladei ka por ban bishar bniah biang ïa kane ka kam.”
Ha kajuh ka por, ka HSPDP ka la kyntu ka Sorkar ban pynthikna ba kan khmih bniah biang sa shisien ïa ka State Reservation Policy khnang ba kan ym pynthud ïa ka shongsuk shongsaiñ ha ka jylla.
“Namar ba ka sobjek ka long kaba kyllaiñ bad kaba jem, ka Sorkar ka dei ban husiar bad shim ïa ki lad ki lynti khnang ba kane ka mat kan ym pynthut ïa ka shongsuk shongsaiñ hapoh ka imlang sahlang bad ka jylla baroh kawei. Wat hapdeng ki katto katne ki jingai jingmut ba la kdew haneng ka party ka kwah ïohi ïa ka jingai jingmut kaba bha da ka komiti kaba la thaw da ka Sorkar Meghalaya,” la ong shuh shuh u Bah Ryntathiang.
