Shillong, Rymphang, 24: Ki dkhot ka Khasi Students’ Union, Laban Circle ha ka janmiet 23 tarik u Rymphang 2026 ki la ïoh bat ïa ki 15 ngut ki bar jylla kiba dei ki Muslim ïa kiba la kynnoh ba ki sah be-aiñ ha kawei ka ïing sah wai kaba tang ar kamra ha ka shnong Laban, Shillong.
Ha u kyrwoh ba la phah da u General Secretary ka KSU Laban Circle u samla Shining Star Chyne ryngkat bad ki video, ka seng ka la kam ruh ba kine ki bar jylla kim don ïa ki kot ki sla kiba biang bad ki la sah ruh khlem ka jingtip jong ka Dorbar Shnong.
Ka KSU ka la ong ruh ba ïa kane ka ïing shongwai la ai sha ki ar ngut ki briew ki bym shym la sah shuh ha ki bnai ba ladep bad ïa ka ïing la ai pat pateng sha ki 15 ngut ban shong beaiñ khlem ka jingtip jong ki trai ïing ne ïoh jingbit na ka dorbar shnong.
Ïa kine ki 15 ngut ki bar jylla ka seng ka la pynher krad da kaba phah leit phai biang sha ka jylla ba ki wan.
Lyngba une u kyrwoh ka KSU ka la pynkynmaw biang sa shisien ba katkum ka jingïalang kaba la long hapdeng ka KSU bad ki 7 tylli ki Dorbar Shnong kiba kynthup hapoh ka Rait Laban Dorbar Pyllun bad Dorbar Shnong Lawsohtun ha ryngkat ka jingïadon lang ki Pulit jong ka Laban Police Station ha 5 tarik, Nailur, 2025, la shim ïa ka rai ba ym shah shuh ïa ki bar jylla ban shongwai hapoh kine ki Dorbar Shnong khlem da ïoh jingbit bad ka jingpynskhem na ki Dorbar Shnong.
Ka Seng ka maham ruh ïa ki trai ïing ba ki dei ban burom ïa kane ka rai bad kim bit satia ban ïaleh pyrshah da kaba ai wai ïa ka ïing jong ki sha ki bar jylla.
