Shillong, Nailar, 30: Ki dkhot ka Khasi Students Union (KSU) Laban Circle kiba la pynlong ka jingap shrip kylleng ka thaiñ Riat Laban Dorbar Pyllun bad ban buddien ïa ka jingrung jingmih jong ki mynder hapoh ka thaiñ ha ka janmiet sngi Thohdieng ki la ïoh bat 58 ngut ki nongbylla bar jylla.
U kyrwoh ba la phah da u General Secretary ka KSU Laban Circle ha ka sngi Saitjaiñ u la pyntip ba ki dkhot jong ka seng ki la ap shrip naduh ka por 4:00 baje janmiet haduh ka por 9 baje mynmiet ha Red Cross, Iewdak kaba hap hapoh ka Dorbar Laban, ha Mynsiañ Ranab kaba hap ha ka Dorbar Lower Lumparing, ha Cliford Nongrum Road kaba hap hapoh ka Dorbar KOR bad ha Taxi Point kaba hap hapoh ka Dorbar Shnong Lumshatsngi ban ïoh bat ïa ki mynder kiba ju leit phai sha ki jaka sah ha ki bynta ka thaiñ Laban ynda ki la wan phai na ki jingbylla.
Ha kane ka jingap shrip, na ka liang ka seng ka la ïoh bat haduh 58 ngut ki bar jylla bad na kine ki don 22 ngut ki bym don kot eiei ruh ban pynshisha ïalade.
Ka seng ka la pyntip ba ka la lap ba bun na kine ki bar jylla ki dei ki Muslim kiba
wan phet na ka jylla Assam bad na kiwei kiwei ki jylla bad ki leit sah ha ki iing wai ha ka thaiñ Laban khlem da pyntip sha ki Dorbar Shnong.
Ka Seng ka la kynnoh ba dei ki Muslim kiba shong basah ha Laban bad ha Lower Lumparing kiba ai jaka rieh ïa ki Muslim kiba phetwir bad kane ka la pynlong ïa ka seng ban hiar sha Three Pine Colony, Laban kaba don kumba 80-100 tylli ki longiing Muslim bad hangne ka la lap ba bun ngut ki longiing ki ai jaka rieh ïa kine ki Muslim phetwir.
Hadien ba la ïoh bat ka seng ka la aiti noh ïa kine ki briew sha ki Pulit ka Laban Police Station.
Lyngba u kyrwoh ka seng ka la maham tyngeh sha baroh ki nongshong shnong jong ka thaiñ Laban la ki dei ki Khasi ne ki bym dei ki Khasi ne ki Muslim ba kim bit ban ai wai ïa ki Muslim kiba phetwir na Assam bad na kiwei ki jylla bad ha kajuh ka por ka Seng ka maham ruh ïa ki nongïalam niam ha ki Masjid/Mosque ba kim dei ban ai jaka rieh ne ban pynshlur ïa ki para Muslim ba ki dei ban ai jaka rieh ïa ki Muslim.
