Shillong, Jylliew, 12: U Bah Ronald Bright Kurkalang uba la ujor sha ki Pulit u la pyntip ba ha ka 6 tarik mynta u bnai ha ka por kumba 8.30 baje mynmiet ki runar ki bym lah ban ithuh ki la kyndang jubor ïa ka jaka thep tiar jong ka Scooty jong u kaba don ïa u nombar ML-05U-1257 ha iew Polo, Shillong bad rong tuh ïa ki kot ba donkam ba kynthup kawei ka office ID Card, Aadhaar card, EPIC, PAN Card, ATM Card bad kiwei kiwei.
U Bah HV Lumsuklang Kharkongor u la ujor sha ki Pulit ban pyntip ba ha ka 26 tarik, Jymmang, 2025, ki runar ki bym lah ban tip ki la tuh ïa ki kot donkam ba kynthup kawei ka PAN card, EPIC, office ID card, Aadhaar Card bad ka pisa T. 10,000 na Umsohsun Point, Shillong.
Ka Kong Betsheba Lyngdoh ka la ujor sha ki Pulit ban pyntip ba ha ka 8 tarik mynta u bnai ha ka por kumba 12.30 baje mynstep ki runar ki bym lah ban tip ki la prong tuh hapoh ka dukan jong ka Lower Lummawrie, Laitumkhrah, Shillong bad rongtuh ïa ki mar jot kiba shongdor kumba T. 70,000 hajar.
U Bah Samborlang Thabah u la ujor sha ki Pulit ban pyntip ba ha ka 27 tarik, Jymmang, 2025 ba ki runar bym lah ban tip ki la tuh ïa uwei u mobile tower (40 meter tower bad uwei u shelter bad ki tiar bapher bapher) kiba shongdor T. 11,01,072 lak kiba dei jong ka M/s Gil Infrastructure Ltx., na ka phyllaw jong ka Kong Rose Christine M. Kharsyntiew ha Mawlarman, Nongkroh Rambrai, West Khasi Hills.
U Bah Khambok Lyngdoh u la ujor sha ki Pulit ban pyntip ha ka 11 tarik mynta u bnai ha ka por kumba 3.30 baje mynstep ki runar bym lah ban tip ki la tuh ïa ka motorcycle kaba don ïa u nombar ML-05AD-3878 kaba dei ka jong u para jong u na ka iingsah kaba don ha Lumpyngad, Shillong.
Kawei ka kynthei kaba dei ka nongshong shnong jong ka nongbah Shillong ka la ujor sha ki Pulit ban pyntip ba ha ka 2 tarik, mynta u bnai ka la ïoh pdiang ïa kawei ka khubor bym tip thikna (anonymous message) kaba don ïa kawei ka link, ïa kaba ka la kum khñiot bakla ha ka 8 tarik, Jylliew, bad mar mar ka la ïoh pdiang ïa ka Message ha WhatsApp, kaba dei bad ka ram pisa kaba T. 7,000 hajar ba la bthah ïa ka ban siew hapoh 15 minit, hynrei lym kumta, u nongphah ïa ka khubor bym thikna u la byrngem ban pynsaphriang ïa ki dur jong ka ba ladep shna. Ka nongujor ka la pyntip ba u runar u la ïoh ban ruh tip bniah ïa ka Cal Log, PAN Card bad Aadhaar Card jong ka.
Ka nongtrei jong ka ophis Deputy Commissioner East Khasi Hills ka Kong D. Kharshiing ka la ujor sha ki Pulit ba la lap ïa kawei ka form OBC thok kaba la shon da ka muhor thok bad ka jingsoi jong ka ophis ha ka jingpynshisha ïa ki syrnot jong u Dhananjay Giri.
