Shillong, ïaïong, 06: Ki nongïalam jong ka Meghalaya Anganwadi Workers’ and Helpers’ Union (MAW&HU) ha ka sngi Saitjaiñ ki la pynsngew ha u Myntri ka Sorkar Jylla uba khmih ïa ka tnat Social Welfare Bah Paul Lyngdoh halor ka jingïakynduh jingeh ha kaba ïadei bad ka jingpyntreikam ïa ka Face Recognition System (FRS) bad ka e-KYC kaba ki nongtrei Anganwadi ki hap ban pynthymmai ha ka Poshan Tracker App.
Haba kren sha ki lad pathai khubor hadien ka jingïakynduh ïa u Myntri ha ïingsah jong u ha Lower Mawprem, ka General Secretary jong ka Union ka Kong Diangtimai Lyngdoh Lyngkhoi ka la ong, “ngi la pynsngew ha u Myntri ïa ka jingshem jingeh ha kaba ïadei bad ka jingpyntreikam ïa ka Face Recognition System (FRS) bad ïa ka e-KYC kaba ki nongtrei Anganwadi ki hap ban pynthymmai ha ka Poshan Tracker App namarba ka jingkynriah jaka sah ki nongïoh jingmyntoi kaba ki hap ban pynïasoh ïa u Aadhaar, ka jingthut ha ka jingbym ïohpdiang ïa u OTP Number ha ki phone nombar na ka daw ka jingthud ka Network kaba la pynlong ïa ki nongtrei ba kin hap ban leit mih ar sien ne lai sien ha ka shibnai.”
“Ngi la kyrpad ïa u Myntri ba ka Sorkar Jylla kan kyntu ïa ka Sorkar Pdeng ban leh ïa ka FRS bad e-KYC tang shisien haba pynshisha ïa ki nongïoh jingmyntoi bad ban pyllait na kaba leh manla u bnai khnang ban pynsuk ïa ka jingkit bakhia jong ki nongtrei Anganwadi,” ong ka General Secretary ka MAW&HU.
Ka Kong Diangtimai ka la ong ba ka mat jingdawa ba ka Union ka la pynsngew ha u Myntri ka long ruh ban pynkiew ïa ka Honorarium sha ka T.26,000 hajar na ka bynta ki Anganwadi Worker bad T.21,000 hajar na ka bynta ki Anganwadi Helpers ha ka shi bnai da kaba ithuh ïa ka jingshakri bakordor ba ki la noh synniang sha u sup u thiar jong ka imlang ka sahlang khnang ba kum ki nongshakri kin dup lah ban pyndap ïa ki jingdonkam ha la ki jong ki ïing ki sem namar ka jingkiewdor jong ki marbam mardih na ka por sha ka por.
Haba ïadei bad kine ki mat jingdawa, u Myntri u la pyntip ïa ki nongïalam jong ka Union ba ka Sorkar Jylla kan sa khot da ka jingïalang hapdeng ka tnat Social Welfare bad ka Union ban ïakren sani halor kine ki mat jingdawa.
