Shillong, Naiwieng, 27: Ki nongïalam ka Meghalaya SSA Schools Association (MSSASA) ki la buddien na u Myntri ka tnat Pule Puthi ka Sorkar Jylla u Bah Lahkmen Rymbui ha kaba ïadei bad ki rai bad ban pyntreikam ïa ka jingpynskhem ïa ka kam jong ki nonghikai skul SSA bad ban pynryntih da ka rukom siew tulop kaba thymmai.
“Ngi sngewnguh ïa ki sienjam ba la shim da ka Sorkar Jylla ban pynbeit ryntih ïa ki skul SSA. Ngi la ai jingmut ba ïa kane ka kam dei ban pyndep shwa ban sdang ïa ka Academic Calendar ban wan bad Myntri u la pynthikna ïa ngi ba ka Sorkar kan pyrshang katba lah ban leh ïa kane,” la ong u President ka MSSASA Bah Aristotle C Rymbui haba kren sha ki lad pathai khubor hadien ka jingïakynduh ïa u Myntri ha ka sngi Palei.
“U Myntri u la pyntip ruh ba ka jingpyrshang ban pynbeit ryntih ïa ki skul SSA ka lah ban shim por katto katne namarba ka sorkar ka hap ban ïamir jingmut bad ki kynhun bapher bapher khamtam eh ïa ki skul Mishon bad ki skul shimet,” u la bynrap.
Ka seng ka la kyrpad ruh ïa ka Sorkar ba kan pynjlan ïa ka rta thungkam ïa ki nonghikai skul SSA kiba la kut ka rta wadkam hadien ba la pynmih ïa ka Office Morandum ha u snem 2024 ba kin dup lah ban aplai ïa ki kam ba lait ha ki skul Goverment Lower Primary bad Upper Primary.
“Ka Kynhun Myntri ha ka 11 tarik, Nohprah, 2024 ka la mynjur ïa ka Office Memorandum ban pynjlan ïa ka rta thungkam ïa ki nonghikai skul SSA kiba aplai ïa ki post ha ki skul Goverment Lower Primary bad Upper Primary na ka 37 snem sha ka 45 snem. Ïa kane la pyntreikam tang na ka bynta ki Schedule Tribe bad ki Schedule Caste hynrei ym ïa ki General Category,” la ong u Bah Rymbai.
“Halor kane ka bynta, u Myntri u la kren da kaba shai ba ka tnat Pule Puthi kan hap ban shong ïasyllok lang ïa ka tnat Personel bad ïa ka tnat Aiñ,” u la ong.
Ha kaba ïadei bad ka Teachers’ Eligibility Test (TET), u la ïathuh ba u Myntri u la pyntip ba ka tnat ka ladep ban pynkhreh nadong shadong ban pynlong ïa ka eksamin.
“U Myntri u la pyntip ïa ngi ba ka tnat Pule Pulit ka ladep pynkhreh ban pynlong ïa ka eksamin TET hynrei ka jingkylli kaba mih mynta ka long hato ki nonghikai kin dang lah ne kim lah shuh ban thoh ïa ka eksamin TET. Ha ka taiew ban sa wan, u Myntri u la ïathuh ba un sa leit ïakynduh ïa ki bor ba dei peit jong ka Ministry of Education bad ïa ki ophisar ka NCTE ban pan jingpynshai halor ki kyndon na ka bynta ki nonghikai kiba la don lypa ha ka kam,” la ïathuh u Bah Rymbai.
“Ka Sorkar ka kwah ba ïa ka jingjrong ha ka jingshakri jong ki nonghikai dei ban khein kum ki kyndon ban ïoh ïa ka kam,” la bynrap biang u Bah Rymbai.
Halor ka jingpyntreikam ïa ka rukom siew tulop ïa ki nonghikai SSA, u Myntri u la pyntip ba ka Sorkar kan sa pynbna ïa ka jingsiew tulop shwa ka Christmas ka ban treikam naduh ka 1 tarik, Ïaiong, 2026.
“Ka jingbthah ban lum jingtip ha kaba ïadei bad ka jingshakri jong ki nonghikai SSA ha ka kam ladep phah sha baroh ki SDSEO, bad ngi kyrmen ba ïa kane ka kam yn sa pyndep noh shen,” la bynrap shuh shuh u Bah Rymbai.
