Shillong, Naiwieng 01: Ka Khasi Hills Autonomous District Council (KHADC) ha ka sngi Balang ka la rakhe ia ka lyngkhuh sngi iap kaba 64 snem jong u Rev. JJM Nichols Roy uba dei u riewkhraw jong ka jaitbynriew khasi bad ia uba la ñiew ruh kum u Kpa jong ka Sixth Schedule.
Shwa ban sdang ka jingrakhe kynmaw burom, u Chief Executive Member jong ka Khasi Hills Autonomous District Council (KHADC) Bah Pyniaid Sing Syiem ryngkat ki Executive Member, ki MDC bad ki nongtrei jong ka Council ki la buh syntiew ha u durmot jong u Rev. JJM Nichols Roy uba la tei sah pynkynmaw ha phyllaw jong ka District Council.
Kum ban shu pynkynmaw hangne, ia u Rev JJM Nichols Roy la kha ha ka 12 tarik, Jylliew 1884 bad une u riewkhraw jong ka jaitbyndriew Khasi u la khladnoh na kane ka sla pyrthei ha ka 1 tarik Naiwieng 1959.
Haba kren ha kane ka sngi, u Pyniaid Syiem u la ong, “ka jingiatylli hapdeng ki jaidbynriew riewlum bapher bapher ha ka thaiñ shatei Lammihngi jong ka ri India ka dei namar ka Sixth Schedule lane ka District Council kaba la aibor ba kin lah ban pynneh pynsah bad ban pynkhlaiñ shuh shuh lyngba ki kyndon aiñ bapher bapher ba ki MDC ki lah ban wanrah ka aiñ ka ban ithuh haduh kane ka pateng ba mynta. Shibun bah ki jingmyntoi kiba ngi ioh da ka jingdon jong ka District Council.
U la ong ruh, lada ianujor bad kiwei kiwei ki jaitbynriew, kiba bun ki jaitbynriew kim tip shuh naei ki wan namarba kim don ia ka aiñ ka ban iada ia ka jinglong bakyrpang jong ki hapoh ka riti Synshar jong ka ri India hadien ka jingioh jong ka ri India ia ka jinglaitluid. “Hynrei ka jaitbyndriew Khasi-Pnar ka dang lah ban tip naei ngi wan ngi mih, namarba la pynioh ia ka jingiada ba kyrpang hapoh ka riti synshar jong ka ri India lyngba ka Sixth Schedule kaba long ka stieh iada,” ula ong.
