Shillong, Naiwieng 01: Ïa ka lyngkhuh snem sngi ïap ba 66 jong u Rev. JJM Nichols Roy, la pynlong ha u motdur ha Lariti ban kynmaw kum uwei na ki riewkhraw ba don ka phangma ka ba sngur na ka bynta ka Ri Khasi bad ka lawei ki paidbynriew.
Ka sngi sah kynmaw la pynkhreh da ka J.J.M. Nichols Roy Memorial Society, ha ka ba la pynlong jingdwai bad ai jingkren da ki dkhot ba kynthup ïa u Bah Ransom Sutnga, kum u Shongknor Bah Robert Dkhar, Bah H. Suting, bad ka jingdwai na u Rev. B. Pohsngap. Hadien kata la buh syntiew ban kynmaw burom bad sien syntiew ïa ki kam bakhraw jong u Rev J J M Nichols Roy. La pynkynmaw ba u Bah Joy dei uwei na ki rangbah ba long dkhot ha ka ba shna ïa ka Riti Synshar ka Ri India, ka Constituent Assembly of India, bad u la thawaiñ ïa ka Khyrnit Baphra na ka bynta ban ïada ïa ki riewlum baroh ha Ri India ka ba tip kum ka Sixth Schedule .
Ki nongkren baroh ha ka jingïalang ki la pyrto ïa u synñiang jong u Rev J J M Nichols Roy kum u ba la bniah sani ban shna ïa ki kyndon aiñ baskhemm ba wat mynta ka Ladakh ba la ïalam da u Sonam Wangchuk ki la ñiewkor ïa kane ka atiar thawaiñ ba ki la dawa ban pyntreikam ha ka jaka jong ki.
La pynkynmaw ruh ba dang shen la shah kynnoh ba khllem bad tor ka jingshna ïa u motdur u Rev J J M Nichols Roy ha ka ba la kdew kti ia ka Riti Academy, hynrei u Barikor rangbah Bah Raphael Warjri u la pynshai ba la shna kyrkieh na ka bynta ban rakhe ïa ka dorbar Bah jong ki khlieh synshar ki Dorbar Thawaiñ Dalatiti na baroh kawei ka thaiñ ha ka 10 tarik Nailur 2024. La aipor tang da ki bnai ban bujli noh da ka jingtei baskhem hynrei la syntan da ka iktiar sorkar ban pynurlong haduh ba la sdang tor u motdur na ka daw ba la jlan palat.
Jar la katta la plie ïa u motdur jong u Rev J J M Nichols Roy da u Bah Prestone Tynsong, Symbud Myntri Rangbah ha ka ba ïa don lang u Bah Paul Lyngdoh, Myntri Arts and Culture ka Sorkar Jylla ha ka ba la ïa don lang ki kynrem lyndan na baroh kawei ka thaiñ shatei lammihngi na ki Autonomous District Councils ba kynthup ïa u Bah Pynïaid Sing Syiem (KHADC), Pramod Boro (BTC), Pradyot Manikya Debbarma (TTAADC), Purna Chandra Jamatia (TTAADC), M. Laikaw (Mara ADC), Tukiram Ronghang (KAAC), C. Lalmuanthanga (LAI ADC), Rasik Mohan Chakma (Chakma ADC), Thombor Shiwat (JHADC), Albinush Marak (GHADC), Lamphrang Blah, Pynshngaiñlang N. Syiem, Charles Marngar, bad Titosstarwell Chyne, Nongïalam Liang Pyrshah ha KHADC.
Na kata ka kynrum kynram ba shah kynnoh torti ba shna ia u motdur, u Bah Pynïaid Sing Syiem bad Bah Titosstarwell Chyne ki la aiti ha ka Riti Academyban pynbiang bad pynphuh pynphieng ha ka durmot ba shongkun bad la lah ban pyndep ïa kata dang shen shwa ban rakhe ïa ka lyngkhuh sngi ïap ba 66 jong u Rev J J M Nichols Roy da ka ba phuh baphieng. U shongknor jong ka J J M Memorial, Bah Ransom Sutnga u la kren mardor ban kyntiew nam ïa ka kyrteng jong u Bah Joy kum u riewstad bad u riewniam bakhraw u ba la kyntiew ïa ka kyrdan jong ka jaitbynriew hakhmat jong kiwei kiwei ki paidbynriew ha Ri India.
