Shillong, Jylliew, 20: Ka Jubilee Secondary School, Mawryngkneng ha ka sngi Thohdieng ka la kynmaw burom ïa u Thomas Jones, uba la tip kum u Kpa jong ki Alphabet Khasi.
Kane ka jingïalang kaba la long ha ka Hall jong ka skul, ka dei ka bynta ban ai jingithuh halor ka jingnoh synñiang jong u Thomas Jones sha ka pule puthi jong ka jaidbynriew Khasi.
Ka jingïalang ka la long hapoh ka jingïalam u Principal, Rev. A.M. Lawai bad la sakhi da ki nonghikai, ki khynnah skul, lem bad ki kmie ki kpa.
Ka jingkynmaw kyrpang ïa u Thomas Jones kaba dei manla ka 22 tarik Jylliew bad namarba ka hap ha ka Sngi U Blei, la rakhe da kane ka jingïalang ha ka sngi Thohdieng.
U MLA ka Mawryngkneng, Bah Heavingstone Kharpran, u la long u kongsan bad u la ai jingkren halor ka jingim, ka jingshakri bad ka jingïarap u Thomas Jones sha ka ri Khasi. U la ong, “lada ym dei na u Thomas Jones ka jaidbynriew Khasi kan dang sah ha ka jingdum.”
U la pynkynmaw ruh halor ka jingeh ba u Thomas Jones u la mad ha Sohra bad ka jingshah kynthoh ha ki shipai Phareng ha ka por ba u wan sha ri Khasi.
U Bah Heavingstone u la ai jingïaroh ruh ïa ki khynnah skul kiba la shah pynkup burom na ka bynta ka jingshemphang bad ka jinglah jong ki ha ka eksamin Matrik. Wat la kim ïoh rung ha ka top twenty, hynrei ka jingpass jong ki khynnah ka long haduh 15%.
Ka skul ha kane ka sngi ka la pynbna ruh ba naduh mynta bad manla u snem kan pynkup burom da ka “Thomas Jones Academic Award” ïa ki khynnah kiba pas bha ha ka pule puthi.
U Rev. J.L. Warlarpih, Senior Executive Secretary, KJP Synod Pdeng, haba ai jingkren u la pynpaw ba u Thomas Jones u dei u nongpynkylla ïa ka pule puthi jong ka jaidbynriew Khasi.
“Ka skul ka sngew sarong ban kynmaw ïa une u briew uba la pynmih ïa ki dak Khasi, bad uba la ai ka jingshai lyngba ka thoh ka tar,” u la ong.
La pyni ruh ki phawar bad jingrwai kyrpang da ka Jingïaseng Samla Presbyterian Mawryngkneng, kaba la pynshongshit shuh shuh ïa kane ka sngi kyrpang.
