Shillong, Jylliew, 03: Ka Kong Ibansaralin Kharbudon na ka Shnong Langkyrdem ha ka sngi Baar ka la leit hajir hakhmat u Sirdar bad ki Rangbah Shnong jong ka Elaka Mawmluh, Mawmluh Sirdarship, East Khasi Hills hadien ba ka Executive Committee jong ka Elaka Mawmluh ka la khot hajir ïa ka halor ka jingkynthoh pynthohbria jong ka ïa ka Shnong Mawmluh, ha ka ‘comment section’ jong ka YouTube Channel T7 News Channel ha ka 27/05/2025.
“Kane ka khubor ka kren halor ka jingjah jong ki ar ngut ki briew kiba wankai sha Sohra na Madhya Pradesh bad halor ka jingwad ïa ki. Hynrei ka Kong Ibansara Kharbudon ka la kynthoh pynthohbria da kaba ong ba ka tip bha ba don nongshohnoh ha Mawmluh,” ong u Secretary ka Elaka Mawmluh, Mawmluh Sirdarship.
“Ha kane ka jingwan jong ka ban paw hakhmat ka Executive Committee jong ka Elaka Mawmluh, ka la pynpaw ka jingsngewsih halor ki kyntien ba khlem nongrim jong ka bad ka la panmab ruh lyngba ka jingthoh na baroh ki nongshongshnong jong ka Elaka Mawmluh. Ka Executive Committee ka la pdiang ïa ka jingpanmab jong ka bad sneng bad kyntu ba kan ym mlien shuh ban pynthohbria ïano ïano khlem da don ki nongrim kiba thikna,” ong u kyrwoh.
