Shillong, Risaw, 24: Uwei u doktor uba trei hapoh ka Deparment of Gynecology ka NEIHGRIHMS Hospital, Shillong ula shah kynnoh ba u la jrong kti ïa kawei ka nongpang kaba la leit wad jingsumar ha NEIHGRIHMS Hospital, ha ka sngi Balang.
Ki bor pynïaid jong ka NEIHGRIHMS Hospital tang shu ïoh ujor na ka nongpang halor kane ka jingjia ki la thaw da ka Komiti ban tohkit bniah halor kane ka jingjia khnang ban lap ïa ki jingshisha baroh.
Ki nongïalam ka Khasi Student union (KSU) Shillong Mihngi Circle ha ka janmiet sngi Palei hadien ba la ïoh pdiang ïa ka jingujor na ka longkmie ki la leit ban ïakynduh ïa u Medical Superintendent bad ïa u Director jong ka NEIGRIHMS Hospital u Dr. Nahlin Mehta ban pan jingpynshai kiei ki sienjam ba kum ki bor pynïaid jong ka Hospital ki la leh halor kane ka jingjia.
“U Medical Superintendent u la pyntip ïa ka jingjia sha u Director bad mynta ki la thaw ïa ka komiti ba la pynrung dkhot da ki bym dei ki nongtrei jong ka NEIGRIHMS Hospital,” la ïathuh u Education Secretary jong ka KSU u samla Jeremiah Pohthmi ha ka jingïakren bad ki lad pathai khubor.
U la ïathuh ruh u Director jong ka NEIGRIHMS Hospital u Dr. Nalin Mehta u pyntip sh a ka KSU ba kane ka jingjia ka la hap mynta hapoh ka Prevention of Sexual Harassment (PoSH) Act, 2013.
U la ïathuh ruh ba ka nongujor ka la pyntip sha ka seng ba kan ap ïa ka kaiphod jong ka Komiti ba la thung da ka Hospital lada ka ïoh ïa ka hok kan pdiang ïa kata hynrei lada kam ïoh ïa ka hok kan sa ïaid da kawei pat ka lynti.
“Katkum ka jingïathuh jong u Director, ka komiti kan sa shong noh ha ka sngi Thohdieng bad ka jingtohkit ka lah ban jlan la kumno kumno haduh 90 sngi,” la ong u nongïalam ka KSU.
Na ka liang jong u Dr. Mehta u la ong, “ngi la ïoh ïa ka jingujor na ka nongpang. Katkum ki kyndon jong ka Prevention of Sexual Harassment (PoSH) Act, 2013, ngi la pdiang ïa ka jingujor ba ka don ka jingkynnoh ba ka nongpang ka sngew ba ka la shah jrong kti.”
“Kum ka Hospital, ngim shym la shim sting kum ïa kine ki jait kam. Ïa kane ka kam la phah sha ka Adminstration bad ngi la phah sha ka Internal Complaints Commitee. Kane ka komiti ka don ïa ka Chairperson kaba dei ka kynthei bad ki dkhot kynthei napoh ka Hospital bad nabar jong ka Hospital bad nabar ka nongbah Shillong. Ka komiti kan sa leh ïa kaba donkam bad kan ym don bynta eiei ruh em ban shah pynngop ha kino kino ki nongtrei ne ha u Director ne ha u Medical Superintendent,” ula ong.
“Ngin ap shwa ïa ka jingtohkit bad ki jingai jingmut jong ka Komiti bad ngin sa shim ïa ka rai. Ïa ki jingpynshitom yn sa shim katkum ba shah ka aiñ,”u la ong.
“Ka jingaipor ïa ka komiti ban tohkit ka long 90 sngi,” u la bynrap.
