Shillong, Naiwieng, 20: Ki samla pule jong ka skulbah NEHU kiba don hapoh ka shatri jong ka North Eastern Hill University Students Union (NEHUSU) bad ka Khasi Students Union (KSU) NEHU Unit ha ka lah sngi U Blei ki la ai por ia ki bor pyniaid jong ka skulbah NEHU ban wengkam mardor ia u Sports Director ka NEHU u Nantu Das uba long u nongpeit ia ka Security halor ka jingkynnoh ba u donkti ban thombor ia kawei ka kynthei kaba dei ka Referee ha ka sngi U Blei.
Ka NEHUSU bad ka KSU NEHU Unit ki la aiti la ki jong ki jingujor ha u Vice Chancellor jong ka skulbah NEHU u Prof. PS Shukla da kaba dawa ba u dei ban un tuklar mardor halor kane ka jingjia kaba la pynher syrngiew ia ki samla pule kynthei hapoh kane ka skulbah.
La sakhi ruh ba ki dkhot ki samla pule jong ka skulbah NEHU ki la rung da ka bor hapoh ka Conference Hall ha ki kynta ba u Vice Chancellor u dang shong jingialang. U Vice Chancellor u la hap ban pyndem hakhmat ka jingdawa jong ki samla pule da kaba soi ia ka jingujor kaba ki la aiti ha u.
Ha kaba iadei bad kane ka jingdawa jong ki samla pule u Prof. Shukla u la pan por hapoh lai sngi ban leh eiei pyrshah ia u Nantu Das uba la shah kem bad uba dang don ha ka kti jong ki Pulit halor kane ka jingshah kynnoh.
Ka NEHUSU bad ka KSU NEHU Unit ki la dawa ia u Vice Chancellor ba u dei ban weng lut ia ki kam ba la bat da u Nantu Das katba ka jingtohkit jong ki Pulit ka dang iaid shakhmat hadien ba ki bahaing hasem jong ka lanot ki la mudui da ka ejahar pyrshah ia u Nantu Das sha ki Pulit.
U Prof. Shukla ha ka jingiakren bad ki samla pule u la kular ba un sa shimkhia ia kane ka jingjia ba ong ruh ba ka dei ka jingpynpohdor ia ka skulbah bad na ka liang jong u ruh un ym ailad ba kum kine ki kam sniew kin wan jia hapoh ki saw kynroh jong kane ka skulbah.
U la ong ruh tang shu ioh jingtip halor kane mynnin ka sngi U Blei u la khot iakren ia u Registrar bad ia ki Ophisar jong ka skulbah na ka bynta iakren sani halor kane ka jingjia.
“Kumba phi la ai por ia nga lai sngi, ngan sa leh ia kata,” la kular u Vice Chancellor hakhmat ki samla pule kiba pynrem jur pyrshah ia u Nantu Das.
Ka samla Daiaphira Kharsati, ka Research Scholar hapoh kane ka skulbah ha ka jingiakren bad ki lad pathai khubor ka la ong, “kane ka jingleh jong u Nantu Das ma ngi ki Research Scholar kiba trei ha ki Lab haduh 10-11 baje mynmiet ka pynlong ia ngi ban ym don jingshngain lada don kum une u jait briew bad ngi dawa ban weng noh ia u na ka kam kum u Sports Director jong ka Sports Department bad kumjuh ruh uba dei u incharge Security ha Nehu.’
“Haba u nongpeit jong ka Security ka NEHU u long kumne, ngim sngew shngain kum ki kynthei kiba pule ha kane ka skulbah. Ngi ruh ngi kyrshan ia ka jingdawa jong ka NEHUSU kaba aipor ia ka NEHU ban weng kam ia u,” ka la ong
U President jong ka KSU NEHU Unit u Samla Sandy Sohtun u la iathuh ba ka Seng ka la ioh jingtip ba u Nantu Das u leit shaw da kali ia ka Referee na Umshyrpi hadien ba la wan phai na shnong bad jrongkti ia ka hapoh kali bad ynda la poi ha Kiang Nangbah Old Guesthouse u la pyrshang ban jrong kti ia ka bad ha ka jingiaksaid ka la lait phet na ki tyrsim jong une u runar.
“Ngim da tip bha kumno ka jia bad ha kano ka rukom ka jia. Ngi la syllok bad I,” u la ong.
“Ka dei ka Refree kaba u Nantu Das u kular ban ialam ia ka sha Orissa namarba ka don ka Inter University. Ka Tournament kan sdang la shem taiew hynrei u Nantu Das u la phah wan ia ka hynnin ka sngi U Blei nalor ba ka dei ka sngi shuti,” u la ong bad bynrap, “hynrei sngewsynei ba ha kum kata ka por u la shim kabu ban jrong kti pynban.”
Nalor kata, une u nongialam ka KSU NEHU Unit u la iathuh ba ka seng ka la ioh jingtip ba u Nantu Das u la kyrpad ia kane lanot ban iasuk bad ban iamap noh bad u khnang ba un lait ialade na kane ka jingkhlemraiñ.
