Shillong, Risaw, 15: Ka Achik State Peoples’ Front (ASPF) ka la aiti da ka jingujor sha ka Director General of Police (DGP) ka Kong I. Nongrang pyrshah ïa ka jingshah pyndik bad ka jingkynnoh shah khrong pisa ki nongleit nongwan na ka jylla Meghalaya ha ki Pulit Assam ha Kukurkata Outpost bad ha shilynter ka surok Damra Dudhnoi.
Ha ka shithi ba la aiti ha ka sngi Baar, ka ASPF ka la kynnoh ba ki kali kiba don ïa u registration number jong ka jylla Meghalaya ki ju shah pynsangeh khlem kano kano ka daw kaba biang.
Ka la ong ba ki nongleit nongwan ki shah pyntieng, shah byrngem, bad shah kylli jingkylli laiphew jait khlem daw wat haba ki pyni ïa ki kot ki sla kali kiba biang.
La ïathuh ba ki ophisar Pulit ki dawa pisa beit na ki nongñiah kali, bad lada kyntait ban siew pisa ki ngat ha ka jingshah bat da ki kynta, shah byrngem laiphew jait ban kurup ïa ki kali bad shah bat khlem ki daw kiba biang.
“Kum kine ki jingleh kim pynjynjar tang ïa ki nongleit nongwan hynrei ki pynjynjar ruh ïa ka jingïadei hapdeng ki nongshong shnong jong ki ar tylli ki jylla ba marjan,” la ong ka ASPF.
Ka ASPF ka la kyrpad ïa ka DGP ba kan shim ïa kane ka kam ha ka rukom kaba thikna bad ka tnat Pulit na ka jylla Assam khnang ban sangeh noh mardor ïa kum kine ki kam beaiñ.
Ka ASPF ka la ai jingmut ruh ïa ka jingdonkam ban pynlong ïa ka jingpahara lang hapdeng ki Pulit ka Meghalaya bad ki Pulit Assam ban ïada ïa ka hok jong ki nongleit nongwan ne ban buh ïa ki lad kyrpang kiba lah ban ujor na ka bynta ki nongleit nongwan haba ki ïakynduh ïa ka jingshah pyndik ha ka jingïaid lynti.
