Shillong, Naitung 11: Ka Dorbar Dong Demseiñïong ka la pynpaw ka jingsngewkhia halor ka jingkhynra laisen khaïi da ka FKJGP Shillong City hapoh ka shnong ha ka 8 tarik mynta u bnai.
U Rangbah Dong ka Dorbar Dong Demseiñïong Bah Anthony Nongkynrih ha u kyrwoh ba la phah sha ki lad pathai khubor ha ka sngi Palei u ïathuh ba ka Dorbar kam don jingtip halor kane ka kam ba la leh da ka FKJGP bad kum kine ki jaitkam ba la leh da kano kano ka seng ka long ka bym lah pdiang hapoh u pud u sam jong ka Dorbar bad kine ki jait kam ki lah ban wanrah ka jingbym shongsuk shongshngaiñ.
U Bah Nongkynrih u la ong ba ha katei ka sngi ha ka por kumba 1:00 baje haduh ka 2:00 baje noh sngi ïa kane ka jingkhynra la ïoh jingtip da ki katto katne ki nongshong shnong. Haba ki dkhot ka Dorbar ki la poi ha katei ka jaka ha kaba ki dkhot ka FKJGP ki don bad haba kylli na ki shaphang kitei ki kam bad ka jingthmu jong ka jingkhynra bad ba ki dukan ki la hap ban khang noh, ka la don ka jingïania ha katei ka jaka bad na ka liang u Secretary ka Seng Samla Demseiñïong ruh u la shah ktah kti.
Kumta halor kane ka Dorbar ka pynrem jur ïa kane ka jingktah kti ki dkhot katei ka seng ïa u dkhot ka seng samla ha kaba kane yn ym lah satia ban pdiang.
“Namarkata ngi phai sha ki bor pynïaid district ban shim ïa ki kam kiba donkam khnang ba kum kine ki jaitkam kim dei ban jia shuh hadien habud na ka bynta ki jingïada ïa baroh ki nongshong shnong,” ong ka kyrwoh na u Rangbah Dong.
