Shillong, Nailar, 03: Ka Hynñiewtrep Youths Council (HYC) Sohïong Circle ha ka sngi Thohdieng ka la aiti da ka jingthoh ha ka Executive Engineer, jong ka Public Health Engineering (PHE) Electrical Division, Mawphlang Division ban ujor halor ka jingtrei torti ïa ka skim Retrofitting Scheme for providing FHTC ha ka shnong Wahnongkseh bad ban dawa ban pyndam noh ïa ka Work Order jong u Contractor uba pyntrei ïa ka Main Reservoir ha ka shnong Laitnongkseh.
Ha ka dorkhas ba la aiti ruh ryngkat bad ki dur ïa kaba soi da u President u Bah Purningstar Shabong bad u Secretary u Bah Hamarbamut Thabah, ka seng ka la ong ba ka jingpyntrei ïa ka skim Retrofitting Scheme for providing FHTC ha ka shnong Wahnongkseh ka long kaba torti haduh katta katta ha kaba ka jingteh da ki pipe line kiba rit ki bym ïahap bad ka jingdon jong ki longïong kiba donkam ïa ka um. Ka jingteh da ki pipe barit ka long ruh ïa ki pipeline kiba pynïaid na Wahnongkseh sha ka dong Pyndengmawphlang kaba ka Pyndengmawphlang ka la don kham pajih na ka Wahnongkseh. Hynrei kumba ka long, ha Pyndengmawphlang ki don haduh 11 ïng kaba lah ban buh jingeh ïa ki nongshong shnong hadien habud. Ha ka jingshisha, sha ka dong Pyndengmawphlang la kumno kumno dei ban teh da u pipeline u bym duna ïa ka 40mm.
Ka seng ka la kynnoh ruh namar ka jingtrei torti, bun ki pipe ki la dkut noh watla ha katei ka shnong ym pat la lah ban sam um lyngba ki pipe um ba teh thymmai na katei ka Scheme. Kane ka jingdkut/lait noh jong ki pipe ka paw shai ba ïa ka jingpyntrei torti. Kumno ngin mutdur ba u pipe un neh da ki 10 haduh 15 snem lada tang hapoh shi snem ki pipe ki lah bun kiba lait/dkut?
Nalor ba ki dei ki pipeline kiba rit, ki paidbah ki ujor ruh ba ka don ka jingteh shibun ki pipe ba sam ïa ka um kaba lah ban buh jingeh ïa ki paidbah na ka jingbym lah ban ïoh ïa ka um kaba biang katkum kaba la mang da ka tnad Jal Shakti Mission jong ka Sorkar India, la ong ka seng.
Ka jingbym shna top um ha ka dong Pyndengmawphlang kaba don kham pajih na ka Centre jong ka shnong Wahnongkseh bad ka don mynta 11 tylli ki longing bad kuiba la ïathuh da ki nongshong shnong, ka la don ka jingïakren ban shna top um la ka jong ha ka dong Pyndengmawphlang. Hynrei kaba sngewsih ka long ba ha kane ka dong ym shym la shna top um satia watla hapdeng ka jingteh da ki pipeline kiba rit bha.
Ka seng ka la kynnoh ba ym dei tang kitei ki jingtrei torti kiba la kdew haneng hynrei ki don ruh sa kiwei pat ki jingtrei torti.
“Kumta, halor kitei ki mat ba la kdew haneng, ka Seng ngi dawa hakhmat jong phi ba phin bthah ïa u Contractor ba un weng lut noh ïa ki pipeline kiba rit inshi kiba la pynïaid sha ka dong Pyndengmawphlang namarba ki pipeline kiba rit kim lah ban pyndap um ha kaba ïa nujor bad ka jingdon ki nongshnong shnong,” la dawa ka HYC na ka EE PHE bad bynrap, “ngi dawa ruh hakhmat jong phi ba phin bthah ïa u Contractor ba un bujli lut da ki pipe kiba ïahap katkum ka jingdon ki longing kiba hap ha poh ka shnong Wahnongkseh kaba la pyntrei lyngba katei ka scheme.”
Shuh shuh ka seng ka la kynnoh ba u Contractor um treh ban trei jong ïa ka top um kaba heh (Main Reservoirs) ha ka shnong Laitnongkseh. Kiba bun ki pipeline bad ki pipe supply ha ka shnong Laitnongkseh ladep ban pyntrei naduh ka aïom tlang jong u snem 2023-24. Hynrei ki paidbah nongshong shnong haduh mynta kim pat ïoh ïa ka umbam na ka tyllong Wahsnoiñ. Ka daw kaba pynlong ïa kane ka jingbym pat ïoh um ha ka shnong Laitnongkseh ka dei namarba u Contractor uba la ai jingtrei na ka bynta ka Main Reservoir um treh ban trei wat haduh mynta ruh.”
“Na ka liang jong ka Dorbar Shnong Laitnongkseh ka la ïakren, leit ud bad ai jingthoh sha ka ophis jong u SDO Sohiong Electrical Division. Hynrei na ka liang ka ophis jong u SDO kam lah ban leh eiei bad ka ai pynban da ki daw ki bym shong nongrim haei haei ruh tang ban shah liang sha u Contractor,” la ong ka seng.
“Ka Seng ka ïoh jingtip na ki paidbah nongshong shnong jong ka Laitnongkseh ba u Contractor uba pyntrei ïa kane ka dam u dei u briew uba pyrshah ïa katei ka project sam um ha ka shnong Laitnongkseh da kaba u khang wat ban shna ïa ka Dam bad ka Pump House ruh. Hynrei ka Dorbar shnong ka ïaid shakhmat ban shah ban pyntrei ïa katei ka project ha katei ka shnong. Kumta kumba la long mynta ka jingpyntrei ïa katei ka project sam umbam ha ka shnong Laitnongkseh ka ladep kumba 95%. Ngi sngew ban buh jingkylli na ka ophis ba ha kano ka rukom kam lah ban leh eiei halor kane ka jingbym trei jong u Contractor watla ka Dorbar Shnong ka la leit ud la bun bun sien,” la ong shuh shuh ka dorkhas na ka HYC.
“Kumta ngi dawa ba phi dei ban pyndam bad buh dak ïong ïa u Contractor uba pyntrei ïa katei ka Main Reservoir khnang ba ka shnong kan ïoh ïa ka um kumba la mang da ka Sorkar,” la dawa ka Seng.
Halor kitei ki jingdawa, na ka liang jong ka seng ka la ai por ïa ka EE PHE, Electrical Division, Mawphlang Division ban pyndep noh hapoh ar taïew bad ong ruh lada ka ophis kam lah ban leh eiei ka seng kam bynse ban shim da kawei pat ka sienjam.
