Shillong, K’lyngkot, 22: Ka Joint Action Committee (JAC) ki khun ki hajar ka Hima Sohïong ka la phah da ka jingthoh sha u Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem halor ka jingkyrpad ban thung da ka jingtohkit hadien ba ka JAC ka la ïoh jingtip ba u Syiem ka Hima Jirang u la die ïa ka jaka ha ka shnong Umshalani kumba 10 hajar akar hapoh ka shnat Hima Nongwah Mawtamur, Hima Sohiong sha uwei u briew.
Ha ka dorkhas ba la soi da u Chairman ka JAC Bah Purningstar Shabong bad u Secretary u Bah March Kupar Thabah ki la ong, “na ka liang jong ka Joint Action Committee ki khun ki hajar ka Hima Sohiong ngi dap da ka jingsngew kyndit ban ïoh jingtip ba ka don ka jingdie duh jong u Syiem Jirang sha uwei u briew ïa kawei ka jaka kaba don ha ka shnong Umshalani kaba hap hapoh ka shnat Hima Nongwah Mawtamur kaba heh 10 hajar akar. Kane ka jingdie ïa ka jaka kumba 10 hajar akar tam ka long pyrshah ïa ka Ceiling ba la buh da ka KHADC.”
“Kane ka jingdie jaka ka dei hadien ba ka KHADC ka la pynphai biang ïa kane ka ka shnat Hima sha ka Hima Sohiong, hynrei ïa ka kot dulir die jaka la shu ai tarik shadien (back-date),” la ong ka dorkhas na ka JAC.
“Ngim lah ban shu pynshisha la kane ka long neem kaba shisha hynrei lada ka dei kaba shisha ngi kyrpad ba phin sngewbha ban pynsangeh ïa kane ka jingdie jaka namarba kane ka jaka ka hap hapoh ka shnat Hima Nongwah Mawtamur, Hima Sohiong,” la bynrap ka dorkhas.
