Shillong, K’lyngkot, 04: U nongïalam jong ka Khun Hynñiewtrep National Awakening Movement (KHNAM) u Bah Thomas Passah ha ka sngi Saitjaiñ u la kynnoh ba ka National Peoples Party (NPP) kaba bat ïa u lakam synshar hapoh ka jylla ka ap kmang tang kumno ban ïoh thied da ki ‘MDC Readymade’ khnang ban ïoh bat biang ïa u lakam synshar hapoh ki Autonomous District Council (ADC) ha rilum Khasi bad Jaiñtia.
“Ka NPP kan jynjar bha mynta ban ïoh ïa ki Seat, hynrei nga la tip ba kan ap da ki ‘MDC Readymade’ kiba la jop nangne nangtai ba kan ïoh bat (biang) ïa ka synshar ka khadar,” la kam u Bah Passah ha ka jingïakren bad ki lad pathai khubor hadien ba la wai ka jingïalang ka KHNAM bad ki kyrtong ïakhun elekshon jong ka party.
Haba pynkynmaw ïa ka jingïatreilang hapdeng ka NPP, UDP bad Congress ha Khasi Hills Autonomous District Council, u President jong ka KHNAM u la ong, “ki paidbah mynta ki la stad, ki la ïohi ba ka la don ka jingïatreilang hapdeng ka UDP bad ka NPP bad hadien kata ka la don sa ka jingïatreilang hapdeng ka Congress bad ka NPP. Ynda la jan ka elekshon, khnang ba u paidbah un ym mut sniew ki (Congress) weng noh ïa ka jingkyrshan na ka NPP bad ngi tip ynda ki (Congress) la jop kin sa leit ïatrei biang bad ka NPP. Kata, kam don ka jingartatien.”
“U paidbah um dei uba biej bad lehse ki party kiba pyrkhat ban leh khun jakai ïa ka synshar ka khadar ha District Council ki pyrkhat ba u paidbah u dei uba klet biej, uba biej bad ki shim kabu hangta,” u la ong bad bynrap, “ngi kyrmen skhem ba u paidbah un long uba stad bad um dei ban ailad namar ka jingsheptieng mynta ka long ba ka don mynta ka party kaba kwah da ki ‘MDC Readymade’ ban shu thied beit ban ïoh biang ïa ka bor synshar.”
Haba ïathuh ïa ka daw ba ka KHNAM ka la khot jingïalang ïa ki kyrtong, u Bah Passah u la ong, “na kata ka daw mynta ka sngi ngi la buh ïa ka jingïalang bad ki kyrtong jong ka party ban bat ïa ka kular ka jutang namarba ka aiñ kaba khlaiñ tam gha ka pyrthei ka dei ka aiñ jong ka jingïatip lem. Kine ki kyrtong kiba ngi ai tiket ki dei ban don ka jingïatip lem.”
U la ong ruh ba ka jingpynkular ka long ynda ki la jop kim dei ban phet noh na ka party hynrei ki dei ban ïaineh beit hapoh ka party namarba ka aiñ kaba khang ïa ka jingkyntiap seng kam don satia hapoh ki Autonomous District Council (ADC) bad kane ka plie lad ïa ki MDC ban ïarung ïa mih na kawei ka party sha kawei pat bad ka wanrah ruh ïa ka jingbym ïaid beit ka synshar ka khadar ha ki District Council.
Haba kylli, u la ong, “kiba bun ki paidbah ki pynpaw ba ka kam MDC ka long tang ka kam lehkai ban ïoh kynthih sha ka kam MLA. Ka paw ba ka long hi kumta bad ngi la lap na ki sakhi satar ha ki por ba la leit ka batai ïa kata. Dei halor kane ka nongrim jong ka synshar ka khadar ba ka District Council ka tlot. Kim lah ban pyndep ïa ka kamram jong ki katkum ba la aibor ha ka Sixth Schedule.”
U la ai nuksa da kaba ong, “ka jingpynbeit thymmai ïa ka Meghalaya State Investment Promotion & Facilitation (MSIPF), Act, 2024 ban wanrah ïa ka Investment Meghalaya Agency (IMA) ka Section 36 ka kdew shai ba kane ka Aiñ ka lah ban ïaid lait ïa kiwei pat ki aiñ bad ka lah ban ïaid lait na ki riti ki dustur jong ka jaidbynriew jong ngi. Ka District Council ka khlem kren eiei halor kata. Ka aiñ bat khyndew ka hap hapoh ka Para 3 jong ka Sixth Schedule ka dei ka sobjek jong ka District hynrei baroh la shna aiñ da ka Sorkar Jylla. Kine ki wanrah ïa ka jingma kaba khraw bha namarba ka jaidbynriew ka bym don ïa ka khyndew ka dei ka jaidbynriew kaba ïap.”
Shuh shuh u la ong ruh ba haduh mynta ym pat don ki MDC kiba don ka jingkitkhlieh bad kiba sngewthuh ïa ka iktiar jong ka Sixth Schedule bad kiba don ïa ka jingthrang ban pyndep hok ïa ka kamram. “Lada ngi ïoh ïa ki briew kiba biang, khlem jingartatien, ka Sorkar Jylla kam lah ban shu thaw aiñ klumar,” la bynrap u Bah Passah
