Shillong, Nailar 16: Ka KSU East Jaiñtia Hills District ha ka sngi Thohdieng ka la leit ban pynsangeh ïa ka jingtrei ban tei ïa ka jaka mane blei ki kynhun niam Hindu ha phyllaw jong ka District Court Khliehriat ba don syndah bad ka DC Office.
Ka jingleit pynsangeh da ka seng ka long ba hadien ba la ïoh jingtip ba ïa kane ka jaka mane Blei ki Hindu ki thmu ban phah shna jubor bad rah shadien khyndiat ïa ka jaka mane jong ki kaba ïatyngkhuh bad ka kynroh ka District Court, Khliehriat.
Ka seng ha kane ka sngi ka la pynsangeh shisyndon ban pyntrei bad la maham ba lada dang ïai pyntrei kan ym bah khlieh kiba ai hukum ïa kane ka kam.
Ka seng marmar ka la thmu ban leit ïa kynduh ïa ki bor synshar district bad ba dei peit hynrei kim shym la ïohlad satia ban kynduh ïa ki.
Na ka liang ka seng ka la ïoh ban pynsngew ïa u DC halor kane ka mat lyngba ka telephone bad u DC ruh ula pynpaw ka jingsngewkyndit kaba jur halor kane ka jingjia.
Ha ki sngi ba la leit noh ka seng ka la ïoh ban ïakren halor kane ka mat bad na ka liang u DC u la kular kan nym don kano kano ka ban ïaid shakhmat haba ïadei bad ka jaka mane blei bad ruh u la ong ïa mynta yn pynneh ïa ka “Status Quo” bad u la pynpaw sha ka seng ba un ai da ka hukum ban pynsangeh shisyndon ïa ka jingthmu ban tei.
Ka seng ruh ka la pan ruh da ka RTI halor kane ka mat hynrei mynta la ïaid 35 sngi tam khlem pat ïoh jubab bad wat la hadien ba la ujor ïa ka First Appeal.
Ka seng ka buh jingkylli ba balei hap ban pynslem haduh kane, imat ka don kaei kaei sha lyndet.
Ka seng ka pynpaw ka jingkyndit ba wat haba la don kata ka Status Quo hynrei kine ki shitniam Hindu ki thmu beit ban shna jubor bad klun jubor ïa ka jaka sorkar (revenue land) khlem kheiñ snep ïa ka jingbthah ka sorkar bad khlem kheiñ snep bad khlem burom satia ïa ka rai ka District administration.
Ka seng ka tip ruh lyngba ki tnat syntiat jong ka ba ïa kane ka mat kaba dei ban ïaid na u Myntri ba dei peit ka hynrei ka khlem ïaid satia bad u khlem don jingtip eiei hynrei la shu ïasylla da u DC barim u ba lah khmih ïa ka Ri Bhoi District mynta bad katto katne ngut ki nonglilam bad nong pynbor ban ïoh NOC na ka dorbar shnong Khliehriat Pohshnong.
Ka seng ka pynpaw ba ïa ka jaka sorkar lah shah thombor kumne kaba kumno pat ka jingïada kan ai sha u paidbah haba shah klun jaka ha ki nongwei.
Ka seng kan sa kynduh ha ki sngi ban wan ïa u Myntri ba dei peit halor kane ka mat bad ka seng ka maham ruh ba lada yn ïai bteng kane ka jingleh donbor ka seng kan hap shim da ka sien jam ba tyngeh.
