Shillong, Nailar, 11: Ka Khasi Students Union, (KSU) South West Khasi Hills District Unit ha ka Lah Sngi u Blei ka la maham tyngeh ïa u Syiem ka Hima Maharam u Pa’iem Niandro Syiemiong halor ka jingkynnoh ba ka Dorbar Hima Maharam bad u Syiem ki la thmu ban die duh ïa ka jaka hajan Photmula sha ki shipai Border Security Force (BSF).
Ha ka jingïakren bad ki lad pathai khubor, u President ka KSU u samla Forwardman Nongrem u la maham ba ka Hima kam bit satia ban knieh ïa ki jaka rep jong ki khun ki hajar ka Hima bad u la maham tyngeh ruh lada u Syiem bad ka Dorbar Hima ki ïaleh pyrshah, ka seng kan sa shim da kiwei pat ki sienjam.
Kane ka jingpynsngew jong ka seng ka long hadien ba ka la phah da ka jingthoh sha u Syiem ka Hima Maharam ba um bit satia ban die duh ïa ka jaka hajan Photmula sha ki shipai BSF namarba ka dei ka jaka ba la rep la riang da ki khun ki hajar jong ka Hima.
U la ong ba lada don ka ktem sah jong ki shipai BSF kan pynthud ïa ka ïaid ka ieng bad ïa ka leit ka wan jong ki paitbah nongshong shnong bad na ki shnong ba marjan kum ka Photeitsim, Mawlangbah, Mawthoh, Photkroh.
Shuh shuh u la ong ba ka jaka ha Photmula ka dei kaba don ïa ki wah bad ki kshiad, ki thwei kiba lah ban pynkylla kum ki jaka jngohkai bad nalor kata ki nongshong shnong ha ka thaiñ ki la thmu ruh ban pynneh pynsah ïa ki dohum dohwah.
“Hynrei ka jingthmu ban aiti sha ki shipai BSF ïa ka jaka ha Photmula kan pynlong mawjynthud pynban ïa ki paidbah,” la bynrap u President ka KSU SWKHDU.
“Ka seng ka buh jingkylli ïa u Pa’iem Niandro Syiemiong bad kumjuh ïa ka dorbar hima ba balei kim ai da ka jaka kaba ha syndah bad ka jingker saiñar shiah ha khappud namarba ki jaka ki dang kylluid hynrei ban shu knieh ïa ki jaka rep jong ki khun ki hajar jong ka Hima ka long kaei kaei kaba ngim lah ban pdiang,” u la ong.
