Shillong, Naiwieng, 20: Ka Meghalaya Commercial Truck Owners & Drivers Association (MCTODA) ka la rai ban ym ujor sha ka Meghalaya Human Rights Commission (MHRC) lane ban ujor ejahar ha kaba ïadei bad ka jingshah bom lathi bad shah kawang stunt grenade ki nongñiah trok ha surokbah Mawryngkneng, East Khasi Hills District ha ka miet shiteng synnia ka 5 tarik Naiwieng, 2025.
Ha ka jingïakren bad ki lad pathai khubor u President ka MCTODA Bah Mosklander Marngar u la ong, “kiba bun ki la ai jingmut ba ngin leit ujor sha ka Meghalaya Human Rights Commission (MHRC). Hynrei ngi la rai ban ym ujor satia sha ka Commission lane ban ujor ejahar halor ka jingjia ha Mawryngkneng. Ngi la rai ban kiar na kaba ujor pyrshah. Ai ba ngin shah bom shah tied haduh ban da ïap lane ngin shah kem kam leilei namarba ngim kwah ban kyrshan ïa ka ‘divide and rule policy” ka ban phiah arliang hapdeng jong ngi ki trai jylla.”
“Shwa ba ngin ïakhih, haba ngi ïakren bad ki bor pynïaid jong ki karkhan pynmih dewbilat kiba dei ki bar jylla ngi la ïohi ïa ka bor jong ki ba ki la lah ban khyrwait shabi lut bad ka la poi haduh u pud ba ngin ïa kulmar bad ïa mynsaw ma ngi ruh. Ki don ka bor kaba khraw bha. Ka jur bha mynta ka ‘divide and rule policy’. Ki la pyntreikam kumba dang synshar ka Sorkar Phareng ha India lyngba ka East India Company,” la kynnoh u Bah Marngar.
U la kynnoh ruh ba ki bor pynïaid karkhana ki la pharia ïa ka jaidbynriew Khasi da ka “ka ‘divide and rule policy’ da kaba pynïashrut ïa ki paidbah bad ki nongtrei Sorkar.
U Bah Marngar u la pynksan ruh ïa ka nongrim ba ka Association kam kwah ban ujor sha ka MHRC, da kaba ong, “ka Commission kan ym peit ïa ka ishu jong ngi, kin ym wad kaei ka ishu jong ngi, hynrei ngi ïakhun na ka bynta ka ishu ba ngin ïoh ïa u khaw khun bad ban bsa ban btiah ïa ki khun ki kti. Lada ngi ujor ejahar kan khñiot hi ïa ka Sorkar. Ki heh ophisar ki ban ngat ki dei hi ki paradoh jong ngi, naduh ki Magistrate, ki heh Pulit Khasi bad wat ki Pulit langrut Khasi bad ki bar jylla kin lait.”
“Ngi mih sha surok ban ïakhun ïa ka hok jong ngi ym pyrshah ïa ka Sorkar hynrei ngi ïakhun bad ki bor pynïaid karkhana ba ngin ïoh ïa ka hok ba ngi la dawa bad u Symbud Myntri Rangbah (ka tnat Transport) u la ong ba ka jingdawa jong ngi ka long kaba dei. Lada ngim dawa ïa kaba dei ngam tharai na ka liang jong ki ruh kin ai,” la bynrap shuh shuh u Bah Marngar.
U la ong ruh ba ki Pulit kiba kawut lathi ïa ki nongñiah trok ki dei kiba kren da ka ktien Hindi, ïa kaba la sakhi ruh da ki dkhot ka seng bad ki kynthei kiba die sha ha surok.
“Kiba bom lathi ïa ki dkhot jong ngi ki dei ki Pulit bar jylla, ïa kane ngi tip namarba ki kren da ka ktien Hindi,” u la ong.
Haba kylli, u Bah Marngar u la ïathuh ba ka seng kan sa kitkhlieh hi ïa ka jinglut jingsep jong ki nongñiah trok kiba la mynsaw.
U Bah Lamiki Rabon uba dei u dkhot ka seng u la ïathuh ïa ka jingjia kumno u la ngat ha ka jingmynsaw da kaba ong, ‘ki Pulit ki synran ïa ki trok kit mar ki karkhana. Katba ngi dang ieng paidbah (ha surok) ki (Pulit) pynbthei ïa ngi da u bom (stunt grenade) ki shoh da u lathi. Ha ka por ba ki pynbthei da u bom u sied sha kjat jong nga haduh ban da mynsaw.”
“Ngim shym la leh da ka bor, hynrei ngi shu ieng ha surok ban kren ïa ki nongñiah trok ba kin phai dien kylla, tang kumta hi,” u la ong.
Sa uwei pat u dkhot u Bah Yomi Sutnga u la ong, “ym dei ma ngi kiba sdang, ha ka jingshisha ki dei ki Pulit. Haba ngi la phah phai dien kylla ïa ki trok, ngi ïohi ba ki Pulit hi kiba synran ïa ki trok. Tang hadien san minit, ki Pulit ki la pynbthei da ki stunt grenade bad ki la bom lathi.”
