Shillong, Naitung, 28: Ki jaidbynriew Karbi na West Karbi Anglong District, Assam ki la kynnoh ba ki Khasi Pnar kiba shong basah ha ka shnong Lapangap, West Jaiñtia Hills District, Meghalaya ki la pynjulor ïa ki lai tylli ki mawpud da kaba pynbthei da u bomb ha ka miet sngi u Blei.
Ki Karbi kiba sah ha ka shnong Tahpat kaba hap sha West Karbi Anglong District ki la kam ba ki don lai tylli ki mawpud kiba la sieh hapdeng ka shnong Tahpat bad Lapangap jong ka West Jaiñtia Hills District.
Katkum ka jingkam jong ki Karbi, uwei u mawpud u don hapdeng wah, uwei pat u mawpud u don ha pynthor kba bad uwei pat ula shah pynpra ha ki runar ki bym lah ban ithuh hynrei la kynnoh pat ba la leh ïa kane da ki nongshong shnong ka Lapangap.
Ki Karbi ki la kynnoh ba ka por 12.15 baje shiteng synnia jong ka sngi u Blei ki la don Pnar na ka shnong Lapangap kiba la bret da ki tiar jingpynbthei ne ki bomb ban pynjulor ïa u mawpud uba don ha ka Wah.
Ha ka jingïakren bad u Waheh Shnong ka Lapangap u Bah Deimonmi Lyngdoh ula ong ba kane ka jingjia kaba la kam da ki Karbi ka long tang ka jingkynnoh pyrshah ïa ki nongshong shnong ka Lapangap bad u la buh jingkylli ruh ïa ka sorkar Meghalaya la ka la don neem ka jingsieh mawpud hapdeng ka Assam bad Meghalaya naduh ki por kiba mynshwa namarba kum ki nongshong shnong kiba shong ba sah ka kane ka thaiñ haduh mynta kim pat ju ïohsngew ba ladep ban sieh ïa ki mawpud.
