Shillong, Nailur, 03: U Nongïalam ka Liang Pyrshah u Mukul Sangma u la kynthoh tyngeh ïa ka jingtyrwa jong ka Sorkar Jylla ban ïarap pisa bad ban siew tulop ïa ki nongtrei jong ki Autonomous District Council (ADC) bad buh jingkylli ruh ïa ka jinglong tynrai ka Riti Synshar bad ka jingthmu kaba don ha lyndet jong kane ka sienjam.
Ha ka jingïakren bad ki lad pathai khubor ha ka sngi Balang u Sangma u la ong ba ïa ka jingkyrshan pisa dei ban bud pyrkhing ïa ka riti synshar jong ka ri bad ïa ki jingbthah jong ka Finance Commission.
“Baroh kiei kiei kiba ka Sorkar ka leh ki hap ban long hapoh ka jingbthah jong ka Riti Synshar ka ri India. Kam lah ban long tang da ka jingangnud jongno jongno ruh”, u la ong.
U Myntri Rangbah barim u la pynpaw ïa ka jingsngewkhia ïa ka rai jong ka Sorkar ban siew beit ïa ka tulop jong ki nongtrei ki ADC naduh ka 1 tarik, Naiwieng ka lah ban pynkheiñ ïa ka jinglait luid jong ki ADC, kaba la ïada da ka Riti Synshar jong ka ri bad u la buh jingkylli ruh hato ka Sorkar ka la ïamir jingmut neem bad kiwei ki ADC shwa ban shim ïa kane ka rai bad hato kane ka jingleh ka long neem kaba pynduh noh ïa ka jingailaitluid jong ka riti synshar
U Sangma shuh shuh u la kynnoh ba ka jinglong jong ka Sorkar ka lah ban pynpaw ïa ka “jingthmu barieh” ban pyntlot ïa ki ADC, ban ïa kaba pynkhlaiñ ïa ki.
“Hato ki (Sorkar) don katto katne ki jingthmu barieh ban pyntlot suki suki ïa ki ADC. Namar wat ka jingtyrwa jong ka Sorkar ba ïa ka tulop jong ki nongtrei jong ki ADC yn siew beit beit da ka Sorkar Jylla ka ban sdang naduh ka 1 tarik, Naiwieng, kata ka dei ka rai kaba khatduh,” ula ong.
“Nga sngew lyngngoh bad mano ba ki la ïakren ïa kane ka mat? Hato ki la ïakren bad kiwei pat ki ADC? Em, hato kim pynkheiñ ïa ka jinglaitluid jong ki ADC kaba long pyrshah ïa ka jingbthah jong ka Riti Synshar,” la ong u Sangma
Halor ka jingeh jong ki nongtrei ka GHADC ki bym s hym la ïoh tulop mynta la 44 bnai, u Sangma u la kynthoh ïa ka Sorkar ba ka la leh lyndet ïa ka jingkitkhlieh bad ka pynpaw ba kam don jingsngewkhia ïa ka jinglong jingman.
“Ki nongtrei ka GHADC kim shym la ïoh tulop ha kine ki 44 bnai ba ladep. Hapoh kine ki jinglong jingman, hooid ki la don katto katne ki rai kiba skhem kiba la shim ban pynthikna ba ki ADC kin lah kumno kumno ban ïaid lyngba ïa kane ka jingeh. Ki la kyntait noh ïa ka jingkitkhlieh bad ki la theh ïa la ki kti jong ki. Kata ka dei kaei kaei kaba ym lah ban pdiang namar ka Sorkar ka hap ban sngewthuh ïa ka jinglong jingman bad ban sngewthuh ïa ka jingdonkam jong ki ADC”, u la ong.
“Hato ki ADC kin ym lah treikam shuh lada ka Sorkar ka ong ba kam lah ban leh eiei. Kata ka dei ka khubor ka bym ai jingkyrmen ïa ki paidbah. Kane ka jingshim rai jong ka Sorkar ka pyni lehse ba ka don ka jingthmu barieh ban pyntlot ïa ki ADC lym kumta kaei ka jingbatai kaba lah ban pynngeit ïa ngi,” bynrap biang u Sangma.
Katkum ka jingong jong u, ka Sorkar ka dei ban sngap ïa ki jingeh bad ban khanglad ïa kino kino ki jingeh kiba mih ha kano kano ka por.
