Shillong, K’lyngkot, 11: U kyrtong jong ka seng Congress na Nartiang-Wahïajer Constituency u Bah Katbanbiang Lamare u la kam ba u la shah byrngem ha u Bah Donbok Myria uba dei u mama jong u kyrtong ka Voice of the People Party.
Ha ka jingïakren bad ki lad pathai khubor ha nongbah Shillong ha ka sngi Saitjaiñ, u Bah Katbaniang Lamare u la ïathuh ba kane ka jingbyrngem ka long lyngba ka phone call ha ka sngi Thohdieng hadien ba ka seng Congress ka lah pynbna ïa ka kyrteng jong u Katbanbiang kum u kyrtong jong ka party na Nartiang-Wahïajer Constituency.
U Bah Katbanbiang u la pynsngew ruh hakhmat ki lad pathai khubor ïa ka jingïakren ba la rekod ha ka mobile phone hapdeng jong u bad u mama jong u kyrtong ka VPP.
U Bah Katbanbiang u la ong ba un ïaid beit shakhmat khlem ka jingtieng ban ïakhun ïa ka elekshon MDC sha ka Jaintia Hills Autonomous District Council (JHADC) bad u la ïathuh ruh ba u lah rai ba un sa leit ujor da ka ejahar pyrshah ïa u Mama jong u kyrtong jong ka (VPP).
“Tang mar ïa pynbna ïa ka tiket, u Mama jong u kyrtong VPP u la telephone ïa nga ban maham da kaba ong ba nga la shah thied shah die. Ngam ieng ha ka jingshah thied sha die, nga ieng ha ka nongrim bad ha ka jingpeit jong nga ïa baroh ki party ha kane ka jylla nga ïohi ba dei tang ka Congress kaba biang,” la ong u Bah Katbanbiang.
“Nga la don jingmut la slem bad nga don ïa ka thong bad ka jingangnud ban shakri paidbah ïa kiba duk ba suk, ïa ki sem shiliang ki kup shiliang hapoh ka Constituency.
U la ïathuh ba u Mama jong u kyrtong VPP u la kob ruh ban ïathong da pisa mar 1 klur lada u Bah Katbanbiang un jop ïa ka elekshon. “Ngam wan sha phi ki paidbah da ka spah bad nga kheiñ ïa u kyrtong ka VPP uba ïaleh hi da ka mon laitluid, uba ïaleh da ka jingieid, hynrei ki ong ïa nga ban ïathong da ka pisa shi klur,” la ong u Bah Katbanbiang bad bynrap, “kane ka jingmaham jong nga, ka long ban pyntieng pynsmiej hynrei na ka liang jong nga, nga don ka mynsiem ban shakri hok ïa ki paidbah.”
“U kyrtong ka VPP u don ka klur, u Mama jong u, u don ka lak ka klur ka spah ka phew te phi ki paidbah phi dei ban ïaleh pyrshah ïa ka spah ïa ka klur jong ki hynrei ma nga, nga wan sha phi ki paidbah ban pan jingkyrshan ym ban thied ban die, ngam don spah don phew bad ngam dei u nongkhaii. Nga wan ha ka nongrim kaba skhem ban shakri ïa phi,” u la ong.
U la ïathuh ba ym shym la don ba pynbor ruh ïa u ban ïakhun ïa ka elekshon bad ong ruh ba um sheptieng satia ïa ka jingshah maham hynrei un ïaid beit ha ka lynti ban shakri ïa ka imlang ka sahlang ïa ka ri bad ka jaidbynriew.
