Shillong, Jylliew, 27: U MDC ka BJP na Tura Constitunecy u Bernard N. Marak ha ka sngi Palei ula ujor sha u Symbud Myntri Rangbah ka Jylla u Bah Prestone Tynsong uba peit ïa ka tnat District Council Affairs (DCA) da kaba kynnoh ba ki Municipal ki la pynkheiñ ïa ki kyndon jong ka Fifteen Finance Commission.
Ha ka ujor u Marak u la ong, “ki Municipal ki la pynkheiñ ïa ki kyndon jong ka Fifteen Finance Commission bad ïa ka rai jong ka (Fifteen Finance Commission) Co-ordination Committee ba la pynkha ha ka 2 tarik, Rymphang, 2024 kaba la rai ba u CEM un khot ïa ka jingïalang ban ïathir bniah halor ki Plan/Project, ki jingtyrwa bad ki kam ban pyntyllun shakhmat ha kaba pyntreikam ïa ka Fifteen Finance. Ki Chief Executive Officer (CEO) jong ki Municipal kim shym la wan mih sha ka jingïalang kaba la buh ban long ha ka 27 tarik Jylliew, ha kamra jong u CEM, ïa kaba lah ban ñiew kum ka jingbym burom ïa ka ophis jong u CEM bad ki bor ba dei peit jong ka GHADC. La i kumba ki Municipal ki klet noh ba ki treikam hapoh ki jaka kiba hap hapoh ka Sixth Scheduled.
“Ki kyndon jong ka Finance Commission bad ki rai jong ka Co-ordination Committee la pynkheiñ bad ym ñiewkor satia da ki Municipal. Ka rai kaba la shim ha ka jingïalang kaba la long ha ka 2 tarik, Rymphang, 2024 bad ha ka 8 tarik, Jymmang, 2024 ha kaba ïadei bad ki kam pisa jong ka Fifteen Finance Commission la pynkheiñ da ki Municipal namarba ki la phah ïa ki jingtyrwa bad pyntreikam katto katne ka pisa khlem ka jingtip jong ka GHADC kiba long pyrshah ïa ki kyndon. Ka Co-ordination Committee ka la rai ba ki katto katne ki kyndon ha kaba ïadei bad ka jingpyntreikam ïa ka pisa bad mardor ïa ka shithi la phah da u Director ka tnat Urban Affairs hynrei haba tohkit na ka GHADC, ym don wat uwei ruh uba tip shaphang ka pisa kaba ladep ban pyntreikam da ka Municipal,” la kynnoh u Marak.
“Ka jubab RTI ka la pynpaw ba ïa ki projek ladep ban pyntreikam khlem ka jingtip jong ka GHADC bad haba ïa ki jingshisha la phah sha ka GHADC, u CEM jong ka GHADC u la khot ïa ki CEO jong baroh ki Municipal kiba pyntreikam ïa ka pisa hapoh ka Fifteen Finance Commission na ka bynta ki Urban Local Bodies ban wan sha ka jingïalang kaba la long ha ka 27 tarik mynta u bnai, hynrei ym don satia uwei ruh uba wan mih. Kane ka long ka jingbym burom ïa ka shuki jong u CEM,” la ong shuh shuh u Marak.
U la ïathuh ba ha ka 8 tarik, Jymmang, 2024 la rai ba ki Urban Local Bodies (ULB) kin pynlong ïa ki jingïalang bad ki nongmihkhmat na ki ADC hapoh ki jaka sor bad ha kyrdan jong u CEM/Dy. CEM. U CEM u la shimkhia ban khot ïa ka jingïalang ban ai ïa ki jingtip kiba bniah halor ki Plan/Project, ki jingtyrwa bad ki jingpyntyllun shakhmat ïa ki kam katkum ki kyndon hynrei ki CEO ki la kiar ban wan sha ka jingïalang.
Shuh shuh u la ïathuh ba la rai da ka Co-ordination Committee ba ka tnat Urban Affairs bad ki MDC jong ki jaka sor kin pynkhreh ïa ki kam katkum ba la bthah. “Ym don kawei ruh ka ban bud da ka Municipal kaba la pyntreikam ïa ka Fifteen Finance ha ka jaka jong ka tnat Urban Affair. Ki Municipal ki ladep phah ïa ka jingtyrwa khlem ka jingïasyllok bad ki MDC jong ki jaka sor bad shwa ban ïasyllok bad ka GHADC. Ïa ka jingtyrwa la leh da ki Municipal Board kiba namar ka Schedule Area. Katto katne ki projek ki dei kiba shu ïasyriem dur katba kiwei pat ki dei kiba palat na kaba la mang. Ki paidbah ha ki jaka sor kin ym ïoh jingmyntoi na kane,” u la ong.
“Namarkata, nga la thoh ïa ka shithi khyndiat sngi mynshwa sha u Director (Boro) bad ïa ka kopi la phah ruh sha phi lyngba ka email hynrei haduh mynta ym pat ïoh jubab satia,” la ong u Bernard.
“Nga kyrpad ïa phi ban shimkhia halor kane ka kam da kaba pyndam noh mardor ïa ki jingtyrwa ba la phah da ki Municipal Board ba khlem ka jingïasyllok bad ki MDC na ki jaka sor bad ka GHADC bad ban pynsangeh lut ïa baroh ki jingsiew pisa ïa mynta tad haduh ban da ïa pynbeit,” la kyrpad u MDC ka Tura ïa u Myntri ka tnat DCA.
