Shillong, ïaïong 12: U Rangbah Shnong jong ka shnong Bhangarpar, West Garo Hills u Mottior Hussian u la kynnoh ba u Taher Ali uba dei u kurim jong ka Secretary ka Village Employment Council ka Samina Khatun bad u Majibor Ali uba dei u Rangbah Shnong jong ka shnong Pabomari ki la lum pisa beain na ki paidbah ban pynïoh ïa ka skhim shna iing baduk lane ka PMAY-G Scheme.
Ha ka jingïakren bad ki lad pathai khubor u Mottior u la kynnoh ba u Taher Ali u la lum pisa beain haduh 2000 hajar na ki paidbah kiba dei ban ïoh jingmyntoi na ka skhim PMAY-G Scheme.
U Mottior u la kam ba haduh mynta ki don ym duna 38 ngut ki riew paidbah kiba la siew ïa ka pisa sha ka kynhun jong u Taher Ali bad u Majibor Ali namar ka jingtieng ïoh ba ki shah pynduh ïa ka skhim shna iing baduk.
U la ïathuh shuh shuh hadien ba u la ïoh pdiang ïa ka jingujor na ki paidbah jong ka shnong Bhangarpar halor ka jinglum pisa, u la leit ban ujor sha ka ophis jong u Block Development Officer ka Demdema C*RD Block ha ka 18 tarik, Rymphang 2025 hynrei haduh mynta ka ophis kam pat leh eiei pyrshah halor kane ka jingujor jong u.
U Mottior u la kynnoh ba hadien ka jingleit ujor sha ka ophis jong u BDO, ka kynhun jong u Taher Ali bad u Majibor Ali ki la thombor ïa u hajan ka Bhangarpar Lower Primary School bad nalor kata u la kynnoh shuh shuh ba ki don sa 7 ngut ki briew ba la ithuh kyrteng kum u Enamul Islam, Messer Ali, u Gulam Hussain, u Mojibor Rahman, u Tofishuddin Ahmed, u Alom bad u Samsul Hoque kiba la thombor ïa u bad ïa ki paidbah kiba la shah dawa pisa.
Halor kane ka jingjia, ha ka 6 tarik Ïaiong, 2025 u Mottior u la leit ujor da ka ejahar ha Police Outpost Bhogularbitha pyrshah ïa ki 7 ngut bad kynnoh ruh ba kine ki dang ïai bteng ban dawa pisa bad kynnoh ruh ba ki la byrngem ba kin sa leh da kaba tyngeh ïa kino kino ki bym ai pisa.
