Shillong, Naitung, 07: Ka Kong Mildred Jyrwa ka Kmie jong u samla Getwin Jyrwa ha ka Lah Sngi u Blei ka la ujor sha ka Meghalaya Human Rights Commission (MHRC) halor ka jingkynnoh ba u khun jong ka u la shah pynshitom beiñ ha ki Pulit ha Sohra Police Station.
“Ha ka 3 tarik, Naitung, 2025, haba la bna ba ki Pulit ka Sohra Police Stationm ki la wad ïa u khun jong nga, u Getwin Jyrwa, 19 snem, da lade kum ka kmie nga leit ïalam ïa u Getwin ha thanat ha ka por 9:00 baje mynstep, hynrei kaba pynlynngoh ha ka por 3:00 baje noh sngi ynda nga leit shaw u khun u la mynsaw bad nga la ïalam ïa u sha Sohra CHC bad nangne la phah ïalam ïa u ban leit sumar ha Shillong Civil Hospital bad u dang don sha hospital ban shah sumar bad yn sa pyllait ïa u haduh ka 7 tarik, Naitung, 2025,” la pyntip ka kmie ha ka jingujor sha u Chairman jong ka Commission.
“Ka jingujor jong nga ka long halor ka nongrim ba lada u khun jong u leh ïa ka kam runar kaba shyrkhei dei ban pynshitom katkum ka lynti jong ka aiñ ba ki Pulit ki dei ban bud. Ka jingpynshitom ha thanat bad ka jingpyllait noh ïa u khun jong nga ha kajuh ka sngi ka pyni ba ki Pulit ki pynkheiñ pyrshah ïa ka hok longbriew manbriew jong u khun jong nga kat haduh ba ka la ktah ïa ka bor pyrkhat bad ïa ka bor met jong u,” la pynpaw shuh shuh ka kmie ha ka jingujor.
“Nga buh ïa kane ka jingujor pyrshah ïa ki Pulit kiba donkti ban pynkheiñ ïa ka hok longbriew bad nga kyrpad ïa phi ban leh ïa kaba donkam na ka liang jong phi,” la kyrpad ïa ka Kmie ïa u Chairman ka MHRC.
Ha ka jingïakren bad ki lad pathai khubor hadien ba ladep ujor sha ka MHRC, u samla Getwin u la kynnoh ba ki Pulit ki la kawut lathi ïa u khlem jingisynei kat haduh ba un leit pynjhieh ruh um lait shuh ha ka sngi ba u la shah pynshitom
“Uwei u kynjat, uwei u bom. Ki kren beit da ki ktien sniew. Ki shu bom beit, nga panmap ruh kim map. Ki bom haduh ba ngan da shu par ha khyndew,” la kynnoh u samla Getwin bad bynrap, “sha thie leit ban leit pynjhieh ruh ym lait shuh shu jaw khyndiat khyndiat.”
“Ki set ha along, wat ka um ruh kim ai. Tang uwei hi uba ai um ïa nga, uba ïarap ban ai um hynrei nga hap ban dih da ka um painkhana, hap ban bta ïa ka khmat. Wat ban shong ha madan ruh ngam lah shong shuh,” la ïathuh u samla Getwin.
U samla Getwin u la pyni sakhi ruh ïa ka jingshong kaba la jngem na ka jingshah pynshitom.
U la ong ruh ba kane baroh ka la jia tang na ka daw ba u la thab ïa uwei u briew bad hadien ba ka Dorbar Shnong ka la khot hajir um shym la leit mih satia namarba u dei uba leit bylla.
Haba kylli, ula ïathuh ba ka jingïakajia ka dei na ka daw ka jingïabuaid kiad.
Halor kane ka jingjia, ka Kmie ka la ujor da ka ejahar sha u Superintendent of Police ka East Khasi Hills pyrshah ïa ki Pulit ka Sohra Police Station halor ka jingkynnoh ba ki pynshitom beiñ ïa u khun jong ka.
