Shillong, Jylliew 28: Ka jingbym ïasngewthuh jingmut hapdeng ki dkhot jong ka School Managing Committee (SMC) ka Sohksar Upper Primary SSA School ka la pynduhnong haduh katta katta namarba ha kane ka skul ym don shuh wat tang uwei ruh u khynnah ban dang bteng ïa ka jingpule ïa ka Upper Primary ha kane ka skul.
“Ïa mynta, dei tang ka Lower Primary kaba ki khynnah skul ki dang don,” ong u Babu Dominic Mawlong u nonghikai jong ka Sohksar Upper Primary SSA School ha ka jingïakren bad ki lad pathai khubor ha ka sngi Thohdieng bad u la pynpaw ruh ïa ka jinglyngngoh halor ka jingbym pat ïoh ïa ka tulop na ka bynta u bnai Jymmang 2025.
“Haduh mynta u snem 2025, ha ka Upper Primary ym don khynnah skul shuh bad ka daw ka dei ba ka don ka kynrum kynram bad ka jingbym biang jong ka Managing Committee kaba pynlong ban ym don khynnah pule,” u la ong.
U la ïathuh ba ha ka Upper Primary ki don tang ar ngut ki nonghikai ba la ïoh jingsiew na ka SSA bad kawei pat ka dei ka nonghikai 4th Teacher.
Ha kaba ïadei bad ka tulop, u Bah Mawlong u la ïathuh ba haduh mynta ma u bad kawei ka nonghikai kiba ïoh jingsiew na ka skhim SSA kim pat ïoh satia ïa ka tulop jong u bnai Jymmang hynrei lait noh tang kawei ka nonghikai 4th Teacher kaba ladep ïoh ïa ka tulop.
U Bah Mawlong ula ïathuh ba kum ki nonghikai ki ladep ban ai jingtip sha ka ophis District Mission Coordinator jong ka District Mission Office, SSA ka East Khasi Hills District bad na ka liang jong ka Office Joint District Mission Coordinator bad Sub divisional School Education Officer ka la bthah ïa kine ki lai ngut ki nonghikai ban ïarap shipor ïa ka kam hikai skul ha ka Lower Primary jong ka Sohksar-A tad haduh ban da pynmih da kawei pat ka jingpynbna.
