Shillong, Naitung, 16: Ka MP barim jong ka Tura ka Agatha K Sangma ka la kyntait war ïa ki khubor hamsaïa kiba la mih ba ka lah ban ïakhun ïa ka elekshon Rajya Sabha da kaba pynpaw ba kam shym la don kano kano ka jingïakren hapoh ka National People’s Party (NPP) ha kaba ïadei bad ka jingpynieng kyrtong ïa ka.
Ka la pynksan ïa ka jingkut jingmut jong ka ban kyrshan ïa ka rai jong ka seng, la ka long kumno kumno ruh.
“Kumba ka long mynta, ngim pat don kano kano ka jingïakren halor ka shuki Rajya Sabha. Kine ki long tang ki jingmutdur. Kumta, ngam lah ban ai jingmut halor jong ka. Kaba nga lah ban ong ka long ba lada don kano kano ka rai jong ka party, nga kyrshan pura ïa uta u kyrtong,” la ong ka Sangma ha ki lad pathai khubor ha ka sngi Balang.
Haba la kylli hato kan pdiang neem ïa ka jingpynrung kyrteng, ka Sangma ka la ong ba ka dei ka rai jong ka party bad kan kyrshan ïa kata.
“Kumba nga la ong ngim pat don ka jingïakren. Lehse ha ki por ban wan lada don ka jingïakren nga lah ban pyntip hadien. (Namarkata), ngam lah ban ong bad kumba nga la ong, ka dei ka rai jong ka party ym jong nga bad nga shu leit ban kyrshan ïa ka party,” ka la pynskhem.
