Shillong, Jymmang 08: Ka seng Congress kaba don ha ka liang pyrshah ha ka sngi Palei ka la pynbna ïa ka rai ba kan ym don bynta bad ka All Party Committee ba la thung da ka sorkar jylla ban bishar halor ka jingpyntreikam ïa ki railway project ha ka jylla.
Katkum ka jingong jong ka party, ka rai jong ka sorkar ban thaw ïa ka committee ka long tang ka kam ka bym don jingmut tang ban pyni ba la kynthup lang ïa baroh ha kaba ka jingshisha pat ka long tang ban kynnoh lang ïa baroh ïa ki kam ba kim lah ban shim ïa ki rai dalade.
“Ka Congress kan ym don bynta bad kane ka committee namar ngim lah ban ngeit ba phin tan lang ïa baroh bad ban kynnoh ïa baroh. Kam long kaba dei,” ong u Secretary ka Meghalaya Pradesh Congress Committee (MPCC) u Bah Manuel Badwar sha ki lad pathai khubor.
“Ka jingkhmih jong ka Congress ka long kaba shai. Ka sorkar jylla ka khlem thaw ïa ka all-party committee na ka bynta ki kam kiba kongsan kiba ktah ïa ka jylla. Ki la shim hi ïa ka rai halade. Balei namar ki dei kiba bun paid ha ka sorkar. Kumta la shim ïa ka rai da ki paid ba bun jong ka sorkar MDA ba kin shim hi ka rai dalade. Kumta ha kano ka rukom ka Congress kan ïashim bynta ha baroh ki kam kaba kim lah ban rai dalade. Kane ka pyni ïa ka jingtlot jong ki,” u la ong.
“Hato ki la thaw mo ïa ka all party committee ha ka por ba ki la rai shaphang ki casino? Hato ki la buh ïa ka all party committee haba ki la rai shaphang u pud u sam, kumta balei ki shim bad ki jied? u la bynrap.
