Shillong, Jymmang 27: Ka seng Hynñiewtrep National Liberation Council (HNLC) ha ka sngi baar ka la kyntait ba ka don bynta eiei bad u Synshar Khymdeit bad u Wallamjingsuk Barim, kiba la kam ba ki dei ki “area collectors” jong ka seng.
Kane ka la wan kum ka jingpynshai halor ki khubor lyngba ka shithi ba la thoh da u lanot haba ïadei bad ka jingdawa pisa ba la phah sha u President ka Shillong Press Club ba la pynithuh ïa u Synshar Khymdeit kum uwei na ki area collector ka HNLC da kaba ong, “Une u Synshar Khymdeit u dei u juh u briew uba la wan shakhmat ha kine ki por ba la dep ha Shillong Press Club ban kyntait ïa ka jingdonkti jong u.” Ka shithi ka pynpaw ruh ïa ka kyrteng u Wallamjingsuk Barim kum u area collector jong ka HNLC.”
Ha ka kyrwoh khubor u General Secretary ka HNLC u Saiñkupar Nongtraw u la ong ba kane ka jingkynnoh ba phah shithi dawa pisa kaba wan na u Synshar Khymdeit da kaba kam ba u dei u “area collector” ka HNLC kam dei kaei kaei hynrei ka dei tang ka jingpynsaphriang ha ka saiñ pyrthei.
“Ngi ïohi ba kane baroh ka jingkren bad batai kadei tang ka jingpyrshang ban pynthohbria ïa ka kyrteng jong ka council lyngba ki jingleh bakla, ka bym shisha bad ka jingkam kaba pyndon jingsngew,” u la ong da kaba bynrap, “Ngi kyntait ba ngi don kano kano ka jingïadei bad u Synshar Khymdeit ne uwei pat uba kyrteng u Wanjingshai (Wallamjingsuk). Lada ki pulit ki sngew halor ka hok, kumta kadei ka kam jong ki ban kem ïa u Synshar Khymdeit, kheiñ ïa u kum u suba, bad ban pynlong ïa ka jingtohkit kaba biang ym ban pynsaphriang ïa ki khana ki bym shisha lyngba ki nongkhaïi bad ki lad pathai khubor.”
“Lah ban buh ha ka jingkynmaw ba ha 24 tarik u bnai Naitung, 2023, ki pulit ka Meghalaya ki la lap ba ka letterhead ka HNLC kaba la sam kylleng sawdong kadei kaba thok. Kane ka jingpynshisha ka la pynkdiah lyngkhot lyngkhai ïa ki sakhi da kaba bteng biang ban khynñiat sha ka khana kaba rim,” ong u Bah Nongtraw.
Shuh shuh u la kam ba ka seng ka don ki jingtip ba napoh ba ka kyrteng Synshar Khymdeit la pyndonkam bakla da ki katto katne kiba phet na ka seng HNLC na ka daw ka jingmyntoi shimet bad ban pynïaid ïa ki kam beaiñ hapoh ka kyrteng jong ka seng.
“La tip tuh ba u la pyntreikam ïa ka Facebook account ha ka kyrteng ‘Bah Bah Suting’. Ka long ruh kaba donkam ban pynpaw ba ka HNLC kam pat ju phah ïa kano kano ka letterhead kaba don ka jingïasoilang ha kaba kane ka pyni ïa ka red flag kaba shai halor kane ka kam,” bynrap u Bah Nongtraw.
Shuh shuh u nongïalam ka HNLC u la kynnoh, “Kane ka sma ïa ka drama jong ki lad syntiat wat hapoh ka tnat pulit ban thaw ïa ka jingbatai jong ka jingma bad jingsyier bad ban bteng ban ïalam bakla ïa ka HNLC hakhmat ki paidbah.”
“Ki pulit ki dei ban leh ïa ki homework da kaba pyndonkam ïa ki lad pathai khubor kum ka courtroom, bad ban sangeh ïalehkai bad ki jingtieng jong ki paidbah tang ban kynduh ïa ki jingthmu ki kam saiñ hima sima. Kane ka jingpyrshang ban ai rong ïa ka HNLC ka dei ka jingshai kaba bakla kaba kim lah ban jop, ki jingkylli halor kine ki jingbatai bad ba kim dei ban long lang kñia ha ki jingshah pynïaid ha ki kam saiñ pyrthei bad ki drama ki lad pathai khubor,” u la ong.
