Shillong, Nailar, 21 : Ka Meghalaya Industrial Development Corporation Ltd (MIDC) ka la kyntait war ïa ki jingkynnoh ba ka don ha ka jingpynkhreh ban shim ïa ka jaka kaba heh 14 akar ha Umtham, Ri Bhoi, ha ka dor kaba T.450 shi square foot, kaba kot 21 klur tyngka.
“Ngi kwah ban pynpaw shai ba kine ki jingkynnoh ki long kiba bakla bad ki bym don nongrim. Ka MIDC kam don kano kano ka jingthmu, jingtyrwa, ne jingpyrshang ban shim jaka ha Umtham ne ha kano kano ka jaka ha Ri Bhoi ha kane ka khep,” la ong ka MIDC ha u kyrwoh ba la pynmih ha ka sngi Balang.
“Ngi la ïoh pdiang ruh ïa ki shithi na ki katto katne ki kynhun ha kaba ïadei bad kane ka mat. Ngi shim ïa kane ka kabu ban pyntip sha ki bad sha ki paidbah baroh ba kine ki khubor kim dei kiba shisha bad ki bym dei satia ban shim khia,” la ong ka khubor.
Ka MIDC ka la ong ba ka angnud ban treikam ha ka rukom kaba khuid bad ban kyntiew ïa ka roi ka par jong ki karkhana ha Meghalaya ha ka rukom kaba hok bad kaba don ka jingkitkhlieh.
Ïa u kyrwoh la pynmih hadien ki dorkhas ba la aiti da ka Hynñiewtrep National Youth Front (HNYF) bad ka Ri Bhoi Youth Welfare Organisation (RBYWO) sha u Myntri Rangbah ka jylla u Conrad K Sangma ha ka 18 tarik, Nailar.
Ki ar seng ki la dawa ka Sorkar Jylla ba kan pynsangeh noh ïa ka jingthmu ban shim jaka da ka Meghalaya Industrial Development & Finance Corporation (MID&FC) lane da ka Meghalaya Industrial Development Corporation (MIDC) ha ka shnong Umtham ha Ri Bhoi District.
Ka HNYF bad ka RBYWO ha la ki jong ki jong ki dorkhas ki la kynnoh ba ka jingthmu ban shim ïa ka jaka kaba heh 14 akar ha ka jinglut kaba T. 21 klur, kaba mut kumba T. 450 shi phut square, ka long kaba palat pud.
