Shillong, Nailar, 02: Ka Meghalaya Public Service Commission (MPSC) ka la rai ban ym pynmih paidbah ïa ki marks jong ka ka MCS Preliminary Examination hadien ba ka la mih ka jingpyrshah na ki nongïakhun eksamin.
Ha ka jingpynbna paidbah ba la pynmih da u Secretary jong ka Commission la ong, “namarkata, ïa ki marks yn ym pynmih satia ha ka rynsan paidbah. Hynrei, ka Commission kan ailad ïa ki nongïakhun eksamin ba kin peit ïa ki marks jong ki lyngba ka OTP based system.”
Kane ka rai ka la wan shisngi hadien ba ka Khasi Students’ Union (KSU) ka la pynlong ïa ka jingïakhih ha phyllaw jong ka ophis treikam ka MPSC halor ka jingkynnoh ba ka don ka jingleh tuh ha kaba ïadei bad ka jingpynlong ïa ka MCS Preliminary Examination, ka MPS Personal Interview bad ka jingthungkam ïa ki Statistical Officers ha ka tnat Animal Husbandry & Veterinary.
Ka Union ka la dawa ïa ka MPSC ba ka dei ban pynmih mardor ïa ki marks jong ki Candidate kiba ïakhun ïa ka eksamin MCS.
Ka Commission ka la ong ruh, “kane ka long ka jingpyntip sha baroh ki Candidate ba ka jingtyrwa ban pynmih paidbah ïa ki Maks jong ka MCS Preliminary Examination la pyrshah da ki Candidate namarba ka long ka jingpynkheiñ ïa ka hok shimet ne Right to Privacy kaba la pruiddak hapoh ka Article 21 jong ka riti synshar ka ri India.”
“Ka jingpyni paidbah ïa ki Marks khlem ka jingmynjur jong ki Candidate ym tangba kam long kaba dei hynrei ka long ruh ka bym shongnia,” la ong ka jingpynbna bad bynrap, “kan ktah ruh ïa ka jingsngew shimet bad ïa ka jingim shimet jong ki Candidate bad kan long ruh ka jingpynkheiñ ïa ka hok jong ki shimet.”
