Shillong, Naiwieng 09: Ka North Eastern Hill University Students Union (NEHUSU) ka la kyntait ïa ka jingkhot ïakren jong u Vice Chancellor ka skulbah NEHU u Prof. PS Shukla khnang ban dup lah ban shim ïa ka rai na ka bynta ban pynbeit ïa ki jingdawa jong ki.
U General Secretary jong ka NEHUSU u samla Toniho Kharsati ha ka jingïakren bad u nonglum khubor ha ka sngi Saitjaiñ u la ong, “ngi ki samla pule ngi kwah ban phah ïa u kyrwoh uba shai sha u Vice Chancellor ba ngim kwah shuh ban dang ïakren bad u ha kano kano ka jingïakren.”
“Ka jingïakhih ka la ïaid la palat 90 kynta bad ong ruh ba u kyrwoh khubor ba la pynmih da u Vice Chancellor ban dawa ïa ki samla pule ban pynkut noh ïa ka jingïakhih shah jingit bad ban wan sha ka miej ïakren ha kaba ïadei bad ka jingdawa ban weng kam noh ïa u Registar bad u Deputy Registar (Academics), baroh ki jingthungkam beain bad ki jingdawa ban thung ïa ki Pro-Vice Chancellor ha baroh ar tylli ki Campus, hynrei ngi ki samla pule ngi kwah ban kren da kaba shai ïa u Vice Chancellor ba ngim kwah shuh ban don bynta bad u ha kino kino ki jingïakren,” u la ong.
“Shuh shuh, ka jingkyrpad jong u Vice Chancellor ban pynkut noh ïa ka jingshah thngan na ka bynta ka bha ka miat jong ki samla pule, ngi sngew ba kane ka dei tang ka jingpyrshang jong u Vice Chancellor ban kheiñ dewthala ïa ka jingïakhih kaba ma ngi ki samla pule ngi la sdang,” u la bynrap.
Haba pynpaw ka jingkhot ïakren jong u Vice Chancellor ka dei tang ka buit ban pynskhem ïa la ka jong ka shuki, u General Secretary ka NEHUSU u la ong, “ngi kwah ban kren da kaba shai, ba ka jingdawa jong ngi mynta kam dei shuh tang ban weng kam ïa u Registar bad ïa u Deputy Registar (Academics), baroh ki jingthungkam beain bad ki jingdawa ban thung ïa ki Pro-Vice Chancellor ha baroh ar tylli ki Campus, hynrei ka jingdawa ba kongsan eh jong ngi mynta ka long ban kyrpad ïa u Vice Chancellor ba un hiar shuki namarba ba ngim don shuh ka jingshaniah hapoh ka jingïalam jong u.”
“Ngim kwah shuh ïa une u briew ba un don hapoh kane ka skulbah watla u la ïohi ba bun na ki samla pule ki la ïohpang da kaba shah thngan bad shah pynkit sha ki jaka ai jingsumar hynrei um don wat tang ka mynsiem sngew parabriew ban kylli satia shaphang ka koit ka khiah jong ngi ki samla,”la kynthoh u Generral Secretary ka NEHUSU.
Haba kynthoh shuh shuh ïa u Vice Chancellor, u samla Toniho u la ong, “u (Vice Chancellor) u la kham sngew khia ïa ka shuki lajong kaba ngi la dawa ba un hiar shuki bad dei na kata ka daw u la khroh bad thawlad ban khot ïakren katba u lah ei hynrei ka khubor kaba shai na ka liang jong ka Union ka long ba ngim pdiang kum ïa kata ka jingtyrwa bad ka jingkren kaba mih na u Vice Chancellor.”
“Ngin ieng skhem beit ha la jong ka rai ba ngi kwah ïa une u Vice Chancellor ba un hiar shuki noh bad hadien kata ngin sa ïakren ïa kaei kaba ngi dei ban ïakren,” la ong shuh shuh u samla Toniho.
U President ka KSU NEHU Unit u samla Shibait Rymbai haba bynrap halor kane u la ïathuh ba ki jingïakren bad u Vice Chancellor bad ki kam kiba u leh ki long da kumwei.
“Lada u (Prof. PS Shukla) un dang ïai bteng kum u Vice Chancellor ka skulbah NEHU kan nang hiar arsut ha ka kyrdan pule puthi bad ki samla pule kim banse ban ym pule shuh ha NEHU namarba ka kyrdan jong ka skulbah ka la hiar bad kan ktah ha ka thep kam thep jam,” u la ong.
U la ong ruh ba ka NEHUSU bad ka KSU NEHU Unit kam don jingshaniah shuh ban dang don ka jingïakren namarba ka shu kut beit tang tang ha ki jingïakren katba ki kam pat ki long da khongpong.
“Ki jingleh hi jong u Vice Chancellor naduh ba ngi lap ba ki ophisar la shu thungkam be-aiñ bad lada ngi ïakhih shi ïakhih kan sa wan ka Enquiry Committee ka ban tohkit naduh ka sngi ba u la shimti ïa ka kam kum u Vice Chancellor ha kaba ïadei bad ka jingthungkam ïa ki nonghikai bad ki nongtrei kin don kiei kiei sha lyndet kiba ngim lah ban tip. Ngi dawa beit ïa u ban hiar shuki. Lada um hiar shuki ngin dang bteng beit ïa ka jingïakhih,” u la ong.
Haba kylli, u la ong, “ngim treh ban leit sha ka miej jingïakren lymda u hiar shuki.”
“Haba naduh nyngkong um sngap um patiaw balei pat mynta ynda ngi la pynlong ïa ka jingïakhih ula khot ban ïakren. Ka jingkhot ïakren jong u, ka don jingthmu sha lyndet,” la kynthoh u President ka KSU NEHU Unit.
