Shillong, Naiwieng, 03: Ka Sorkar Jylla ka la kyntait ban siew ïa ka Floor Rate bad ïa ka Variable Dearness Allowance (VDA) sha ki nongtrei Muster Roll ha ka jylla baroh kawei.
U President jong ka All Jaiñtia Muster Roll Workers and Labour Union (AJMRWLU) Bah Khroo L. Pariat ha ka jingïakren bad ki lad pathai khubor ha ka Lah Sngi U Blei hadien ka jingïakynduh ïa u Labour Commissioner ka tnat Labour u Jagdish Chelani u la ïathuh ba u Labour Commissioner u la pyntip ba ka jingbym siew shuh ka Sorkar ïa ka Floor Rate kaba dei ban treikam naduh ka 1 tarik, Risaw, 2023 haduh u Nohprah, 2024 ka dei namarba kam da dei eh kaba donkam ïa ka Sorkar ban siew ïa ka Floor Rate bad ka jingbym siew shuh ïa ka Variable Dearness Allowance (VDA) naduh ka 1 tarik, Risaw ka dei namarba kan ktah hi ïa ki Muster Roll na ka daw ba ka Sorkar Pdeng ka la pynhiar ïa ka GST jong ki marbam bad kumba ka long mynta ki marbam mardih ha iew ha hat ki la hiar dor lut nadong shadong.
U la ïathuh ba kane ka jingïakynduh ïa u Labour Commissioner ka long hadien ka jingkhot ïakren jong u Commissioner and Secretary ka tnat Pla Tyngka ka Sorkar Jylla u Dr. Vijay Kumar D. hadien ka jingïakhih jong ka Union ïa ka jingbym siew ka Sorkar ïa ka Floor Rate katkum ba la kdew ha ka Minimum Wages Act, 1949.
U Bah Pariat u la batai ruh ba ka Sorkar, hadien ba la ïoh pdiang ïa ka kaiphod na ka District Statistics Office, ka la batai ba ka dor jong ki marbam mardih ka la hiar. Dei halor kane, ba ka tnat Labour ka la pynpaw ba lada ka pyntreikam ïa ka VDA, ka bainong jong ki Muster Roll ruh ka lah ban hiar dor.
Ha kaba ïadei bad kane, ka Union ka la kyntu ïa u Labour Commissioner ba un ai da ka jingthoh.
“Ynda ngi la ïoh ïa ka jingthoh na ka tnat Labour ngin sa khot da ka jingïalang ha nongbah Shillong ïa baroh ki nongtrei Muster Roll kiba don ha ka jylla Meghalaya ban pynpaw ïa kaei kaba ka tnat Labour ka la phah sha ka Union da ka jingthoh,” ula ong.
U President ka Union u la kynthoh ruh halor ka jingsahkut ka bainong jong ki nongtrei Muster Roll la hynñiew bnai kynthih kiba trei hapoh ka tnat Sericulture and Weaving.
“Dei ban pynshitom ïa ki ophisar jong ka tnat halor ka jingbym siew ïa ka bainong jong ki Muster Roll la hynñiew bnai kynthih. Dei ki Muster Roll kibairep ïa u dieng ryndïa khnang ban ïoh pynmih ïa ki khniang ryndia hynrei ynda ki ladep trei ia ka kam, ka bainong pat kim ïoh satia,” la ong u Bah Pariat.
