Shillong, K’lyngkot, 23: U President ka United Democratic Party (UDP) Bah Metbah Lyngdoh ha ka sngi Baar u la ong ba ka UDP kam kyrshan satia ïa ka jingdawa jong ka Voice of the People Party (VPP) ban thung biang ïa ki ophisar ha ka Meghalaya Lokayukta namar ba ka Sorkar ka weng ïa lai ngut ki ophisar tohkit ka dei namarba ka aiñ kam shah ban thung biang ïa ki ophisar ba la shongthait na ka kam.
Ha ka jingïakren bad ki lad pathai khubor u Bah Metbah u la ong ba ka aiñ ka la shai kdar ba ki ophisar tohkit ka dei beit da ki ophisar kiba dang don ha ka kam ym da kiba la shongthait bad dei na kata ka daw ba ka UDP kam kyrshan satia ïa ka jingdawa jong ka VPP.”
Ngim lah ban kyrshan ïa kaei kaba ki (VPP) dawa namar ka jingdawa jong ki kam dei kaba shongnia shongaiñ,” u la ong.
Haba kylli la kane ka jingïakhih ka VPP ka dei beit na bynta ka jingmyntoi saiñ hima, u Bah Metbah u la jubab, “ngam kwah ban ong eiei ïa kane namar kiwei kiwei ki party ki don la ki rukom treikam na kata ka daw ngam kwah ban kynthoh ïa ka kam jong kiwei ki party.”
Ka VPP ka la pynlong da ka jingïakhih ha ka sngi Thohdieng jong ka taiew baladep bad hynnin ka Lah Sngi u Blei da kaba tur sha Secretariat ban dawa ïa ka Sorkar ba kan thung biang ïa ki lai ngut ki ophisar ba la weng na ka Meghalaya Lokayukta halor ka nongrim ba la weng ïa ki lai ngut ki ophisar haba ki dang tohkit ïa ka jingbamsap pyrshah ïa u bahaiing jong u Myntri Rangbah ka Jylla u Conrad K.Sangma.
Ka VPP ka la pynsangeh shwa shipor ïa ka jingïakhih hadien ba ka Myntri ka tnat Aiñ jong ka Sorkar Jylla ka Dr. Ampareen Lyngdoh ka la kular ban sa buh sngi ban pynlong da ka jingïalang hapdeng ïa ka VPP bad u Myntri Rangbah ka Jylla ban ïakren halor kane ka jingdawa jong ka VPP.
