Shillong, ïaïong, 14: Ka Hima Nongmynsaw Syiemship lyngba u Myntri uba peit ïa ki shnong Garo hapoh ka Hima Nongmynsaw u Bah John Sohshang ka la lum ïa ki nongïalam shnong jong ki 22 tylli ki shnong Garo kiba hap hapoh ka Hima Nongmynsaw Syiemship ban ïathir ïatai halor kiba bun ki mat ha kaba ïadei bad ki jingeh halor ka kam ïakajia pud ha pdeng ka jylla Meghalaya bad ka jylla Assam.
Ha kane ka jingïalang la ïa shim bynta da ki nongïalam shnong na ki shnong Garo kiba hap hapoh ka Hima ha kaba la ïatai sani bha halor ka jingeh na ka jingïai don jong ki briew na ki shnong bapher bapher kiba dang bam ar maloi ha kaba ïadei bad ki jingïoh jingmyntoi na ka Sorkar Assam bad na ka Sorkar Meghalaya.
Ha ka jingïalang da kawei ka sur ki la mynjur lang ban kyntait noh ïa baroh ki kot ki sla kiba dei na ka jylla Assam kum ka EPIC bad ka Ration Card bad rai kut ruh ban leh beit tang na ka jylla Meghalaya.
U Bah John Sohshang u la ong ba ka Hima ka la ju bthah na ka por sha ka por ba ki nongshong shnong kim dei ban bam ar maloi ha kaba ïadei bad ki jingïoh jingmyntoi khnang ba kan ym wanrah jingeh ha ka jingthmu jong ki ar Sorkar ban pynbeit noh ïa u pud u sam.
Na ka liang jong u Emerald Marak uba long u Chairman jong ka Joint Action Committee Village Headman under Nongmynsaw Syiemship u la ong ba ki nongshong shnong ha ka thain ki la im ha kane ka jaka hapdeng shibun ki jingeh ha kine ki phew snem ba ladep namar ka jingduna ki jingïoh jingmyntoi na ka Sorkar Meghalaya kaba la pynlong ïa ki nongïalam ha ki snem ba mynshwa ban pdiang ïa ki jingmyntoi kiba la tyrwa da ka Sorkar Assam.
 | ReplyForwardAdd reaction |
