Shillong, Jymmang, 20: U Symbud Myntri Rangbah ka Jylla uba khmih ïa ka tnat kam Pohing u Bah Prestone Tynsong ha ka sngi Baar u la kyntait ba kan don kano kano ka jingtohkit halor ka jingkynnoh ba dang shen da ka seng kieng atiar Hynñiewtrep National Liberation Council (HNLC) ba la shah kheiñ be-aiñ ba u Symbud Myntri Rangbah uba khmih ïa ka tnat Pynroi Sor Bah Sniawbhalang Dhar u la bei pisa ïa ka seng mynba u dang long u Myntri ha ka sorkar barim ba la ïalam da ka seng Congress.
Ha ka jingïakren bad ki lad pathai khubor, u Bah Prestone u la ong ba ka Sorkar kam da sngew donkam eh ba hap ban thung ïa ka jingtohkit.
“Nga ieng beit tang halor ka jingkren jong u (Dhar). U la dep ai jingpynshai ba ngam don kum kata ka jingïadei ne kam don kum kata ka jingsiew pisa (sha ka HNLC). Te, sa kaei pat kaba ngin lehï Nga ieng halor ka jingkren jong u”, u la pynpaw haba kynthoh ïa ki jingdawa ba la dawa da ka VPP bad ka Congress.
“Shu buh lada don napdeng jong ki paidbah ki bym sngewhun ïa kata, ki long kiba laitluid ban wad bniah shuh shuh katto katne ki jingtip bad ïa kaei kaei kaba ki kwah hynrei katkum ka jingsngew jong ka sorkar, kata ka jingkren kaba u (Dhar) u la ai la pdiang,” la bynrap u Bah Tynsong.
Haba kylli, u Bah Tynsong u la ong, “ka jingtohkit aïu? Em, peit lada ngi hap ban thung ïa ka jingtohkit halor ka jingkynnoh, ngi don da ki hajar tylli ki jingkynnoh. Hato phi pyrshang ban ong ba ngi donkam ban thung ïa ka jingtohkit halor ki hajar tylli ki jingkynnoh? Phi donkam ban sngewthuh ïa kata ka jingshisha ba shapoh ruh.”
