Shillong, Jymmang, 08: Ka Meghalaya Pradesh Congress Committee (MPCC) ka pynpaw ïa ka jingsngew shyrkhei ban ïohi ïa ka khubor kaba kynnoh ba u Bah Sniawbhalang Dhar uba dei u dkhot barim jong ka seng Congress u donkti ban bei pisa ïa ka seng kieng atiar HNLC ba la shah kheiñ beaiñ.
“Ka party ka kyntait mardor ba kam don ïa kano kano ka jingtip lane ka jingdonkti ha kine ki kam be-aiñ ba la kynnoh. Lada ka (jingkynnoh) ka long kaba shisha, kine ki dei tang ki kam shimet jong u Bah Dhar kiba u leh hi shimet khlem ka jingïarai lang lane ka jingmynjur jong ka party,” la ong u kyrwoh na ka MPCC.
“Namar ba ka jingkynnoh ka long kaba sngewkhia, ngi dawa ïa ka jingtohkit kaba kyrkieh, kaba bniah bad kaba khlem da ïashah liang da ki bor synshar,” la bynrap u kyrwoh.
“Ban pynthikna ïa ka jingtohkit kaba khuid bad ban lait na kano kano ka jingtuklar saiñpyrthei, ngi dawa ïa u Bah Snïawbhalang Dhar ba un hiar mardor na ka shuki Myntri katba dang ap ïa ka jingmih na ka jingtohkit,” la dawa ka MPCC.
“Ka seng Congress ka ieng skhem na ka bynta ka jinglong khuid, ka jingkitkhlieh, bad ka synshar aiñ. Ngi pynrem jur ïa kano kano ka jingïadei bad ki kam beain lane ki kam kiba long pyrshah ïa ka ri bad ngin ym lah satia ban shah ïa kum kine ki jingleh,” la ong ka MPCC.
“Ka seng ka kular ban ïatreilang pura bad ki bor synshar bad ka shaniah ba ïa ka hok yn pyndep kloi lyngba ki kyndon aiñ kiba dei. Ka Meghalaya Pradesh Congress Committee ka ïai neh ha ka jingshakri ba khlem shongthait na ka bynta ki paidbah jong ka jylla Meghalaya da kaba pynneh ïa ka jinglong ba janai bad ka jingsynshar kaba don ïa ki nongrim,” la bynrap shuh shuh u kyrwoh.
 | ReplyForwardAdd reaction |
