Shillong, Jymmang, 22: Ka Hynñiewtrep Youth Council (HYC) ha ka sngi Balang ka la dawa ïa ka North-Eastern Indira Gandhi Regional Institute of Health and Medical Sciences (NEIGRIHMS) ban kyntiew ïa ka Seat pule MBBS bad Nursing na ka bynta ki samla pule na kane ka jylla Meghalaya ka ban sdang naduh ka samoi pule kaba mynta.
Ha ka dorkhas ba la aiti ha u Director jong ka Institute, u President ka HYC u Bah Roy Kupar Synrem u la ng ba ka jingdon jong ki Seat pule na ka bynta ka MBBS ha NEIGRIHMS ba la mang tang na ka bynta ka jylla Meghalaya katkum ka Admission Notice ha u snem 2023-2024 ka long tang 14 Seat na ki 50 seat.
Ïa ka jylla Nagaland la ai 10 Seats bad la ai paidbah sha baroh ki jylla ka thaiñ shatei lammihngi kynthup ïa ka Sikkim 18 seat. Kumba ka long, kiwei kiwei ki jylla ka thaiñ shatei lammihngi kynthup ïa ka Nagaland ki dei kiba la don la ki jong ki Medical College ha ki Jylla jong ki.
“Namarkata, ngi dawa ba ki Seat na ka bynta ka jylla Meghalaya dei ban kyntiew naduh ka samoi pule kaba mynta,” u la ong.
U Bah Synrem u la kdew ba ka NEIGRIHMS ka don ïa ka College of Nursing ha ka jingpule M.Sc Nursing bad B.Sc Nursing Courses kaba don haduh 10 seat bad 50 Seat.
“Hynrei, ym shym la mang satia ïa ki Seat na ka bynta ki samla pule ka jylla Meghalaya ha kine ki ar tylli ki Course. Namarkata, ngi dawa ïa ka Institute ba kan shimkhia mardor ban mang kyrpang ïa ka Seat na ka bynta samla pule riewlum ritpaid jong ka Jylla Meghalaya naduh ka samoi pule ojng u snem 2024 bad ban pynshong nongrim na ka Merit List jong ka All India NEET examination,” u la ong.
Ka HYC ka la dawa ruh ïa ka Institute ban pynbeit thymmai ïa ka Recruitment Rules (RRs) lyngba ka Advertisement kaba la pynmih ha ka 17 tarik, Risaw, 2023 kaba dei na ka bynta ka jingthung ha ka kam Store Keeper.
“Da kaba buh ïa ki kyndon jong ka “Possessing Diploma/Degree in Materials Management/Warehousing Management/Purchasing /Logistics/ Public Procurement from recognised University/ Institute”…ka dei ka jingpyrshang jong ka Management ban kyntait khamtam ïa ki nongthep kam trai jylla kiba la trei da ki snem ha ka kam ha kaba ïadei bad kane ka kam ba ki aplai,” la kdew u Bah Synrem.
“Wat ki shlem pule kum ka AIIMS, New Delhi kim shym la buh ïa ki kyndon ba eh hynrei ki la ai jingithuh ïa kiba la tbit ha ka kam khamtam ha kaba ïadei bad ka jingthungkam. Namarkata, ngi dawa ba dei ban pynbeit thymmai ïa ka RR kaba long ryngkat bad ka AIIMS, New Delhi bad ban sangeh mardor ka jingthungkam tad haduh ban da pynbeit pura ïa ki rukom treikam,” u la bynrap.
Ka HYC ka la kyntu ruh ki bor pynïaid jong ka NEIGRIHMS ban thungkam Nurse ïa ki trai jylla, kiba la don ka jingtbit bad ka kyrdan pule kaba biang ban thung ïa ki kam kiba lait bad ban pynrungkam ïa ki Nurse kiba la trei contractual basis hapoh ka Institute.
Katkum ka jingtip ba la ïohlum kumba 40 haduh 50 ngut ki briew ba la shah thung kum ki Nursing Officers ha ka jingthungkam baladep lyngba ka NORCET kim shym la leit trei ïa ka kam ne iehnoh ïa ka kam.
“Kano kano ka jingpyrshang ban pyndap ïa ki kam kiba thylli na ka thup kyrteng jong ka NORCET ba dang shu dep pynlong shen ngin ym pdiang da leilei namarba ngin ieng ha ka nongrim kaba ngi ladep ïakynduh ïa phi. Ïa ka jingthungkam dei ban leh da ka NEIGRIHMS da kaba pyndonkam ïa ka OMR method na ka bynta ka jingïaid beit jong ka kam,” la ong ka HYC ha ka dorkhas.
Da kaba pynkynmaw ba ka Institute ka dei kaba don hapoh u pud u sam jong ka KHADC, u Bah Synrem u la ong ba ka long kaba donkam ïa kino kino ki bym dei ki trai jylla kiba ïohkam hapoh NEIGRIHMS ba ki dei ban ïoh ïa ka Trading Licence na ka KHADC.
“La lap ba dang shen ka jingdie ïa ki Tender da ka Store & Procurement Section, NEIGRIHMS kam shym la buh ïa ka kyndon kaba bthah halor ka Trading Licence na ka KHADC. Kane ka long ka bym lah satia ban pdiang bad kino kino ki briew kiba donkti ban ym pynrung ïa ka kyndon ban shim ïa ka Trading Licence na ka KHADC dei ban pynshitom da ka Institute. Ngi ïaiban ïa ka jingshisha bad ka nongrim ba ngi ieng ba ka NEIGRIHMS ka dei ka Autonomous Institute kaba don hapoh ka Tribal Area jong ka jyla Meghalaya da ka jingthmu ban ai jingshakri ïa ki paidbah nongshong shnong ka jylla Meghalaya baroh kawei. Namarkata, dei ban plie lad nyngkong eh ïa ki trai jylla ban ïohkam bad kumjuh ruh ha ka pule puthi ha ki Course bapher bapher ba la tyrwa da ka Institute,” la ong ka seng.
