Shillong, Jymmang, 29: Ka kynhun ki nongialam jong ka Raid Mynsaw ba la lamkhmat da u President ka Hill State People’s Democratic Party (HSPDP) u Bah KP Pangniang ha ka sngi Palei ka la kyntu ïa ka sorkar jylla ban sdang noh ïa ka jingïakren ïapynbeit pud hapdeng ki ar jylla ha kaba ïadei bad ka bynta jong ka Langpih ha West Khasi Hills District.
La ai ruh ia ka dorkhas ha kaba iadei bad kane sha u Myntri Rangbah ka jylla u Conrad K Sangma bad ha u Chairman ka Regional Committee na ka bynta ka West Khasi Hills u Bah Paul Lyngdoh.
Haba kren sha ki lad pathai khubor, u Bah Pangniang uba dei ruh u dkhot jong ka Regional Committee, u la ong ba ka jingialang paidbah, kaba la long ha Langpih ha ka 19 tarik, Iaiong ba la iashim bynta da ki khlieh nongsynshar, ki nongialam shnong, ki nongshong shnong bad ki nongmihkhmat paidbah hadien ka jingiakren kaba bniah da kawei ka jingmut la rai ban kyntu ia ka Sorkar ban sdang biang ia ka jingiakren ha kaba iadei bad ka thaiñ Langpih.
“Ki jingiakren ki dei ban long katkum ki nongrim ba la mynjur lang, kata, (1) Ka jingpeit ia ka histori 2. Ka jinglong jaitbynriew jong ki nongshong shnong 3. Ka jingiajan bad u pud u sam 4. Ka jingsngewthuh ia ki briew kiba im 5. Ka jingsuk ha ka rukom synshar,” u la ong.
U bah Pangniang u la ong ba ki paidbah ka thain Langpih ki la pynpaw ia ka jingsngewnguh ia u Myntri Rangbah ka jylla Assam u Himanta Biswa Sarma bad u Myntri Rangbah ka jylla Meghalaya u Conrad K Sangma kiba la leit jngoh sha Langpih ha ka 16 tarik Naiwieng 2022.
“Ka jingwan jngoh jong ki Myntri Rangbah jong baroh ar tylli ki jylla ka la pyni ia ka mynsiem kaba khia bad ka jingshimkhia na ki ar tylli ki jylla ban pynbeit ia ka jingiakynad kaba la slem bha halor u pud u sam jong ka jylla Meghalaya bad ka Assam”, u la bynrap.
