Shillong, Lber, 22: Ka North-Eastern Hill University Students’ Union (NEHUSU) bad ka Khasi Students’ Union (KSU) NEHU Unit ki la kyntu ïa ki nongtrei jong ka skulbah NEHU ban kyntait mardor ïa baroh ki jingbthah bad ki hukum ba la pynmih da u Vice Chancellor u Prof PS Shukla bad u Registrar u Col Omkar Singh.
Ha ka shithi ba la phah sha ka North-Eastern Hill University Non-Teaching Staff Association (NEHUNSA) dang shen, ka NEHUSU bad ka KSU ki la ong, “ngi phah da kane ka jingthoh ban kyrpad ïa ka kynhun jong phi bad ïa ka kynhun ki nongtrei ban kiar na kaba pdiang ïa kino kino ki jingbthah, ki hukum, ki jingïalang, ki rai bad kiwei kiwei ki jingbthah, ba la pynmih da u Prof. P. S. Shukla bad u Col. Omkar Singh.”
Ki la kynnoh ba kine ki arngut ki briew ki la pyrshang ban ban treikam katba ïalade kim don satia ha ophis treikam bad ki la shu phah da ki hukum bad ki kamram shabar u pud treikam ka University Acts and Statutes, kaba long kum ka jingpynkheiñ ïa ka Section 6 (1) jong ka NEHU Act, 1973.
“Prof. P. S. Shukla u la shu don beit lynter tait ha ka shuti haduh 127 sngi bad um shym la lah ban trei ïa ka kam naduh 15.11.2024. Ka jingkam jong u ba u la treikam lyngba ka online mode na Delhi ka dei kaba leh be-aiñ, kaba khlem nongrim, bad kaba long pyrshah ïa ki kyndon bad ki jingbthah ba la buh jong ka skulbah jong ngi. Ka long kaba donkam ban pynpaw ba ym don kano kano ka kyndon jong ka skulbah kaba ailad ban treikam ïa ki kam na jngai.
Kane ka jingleh ba khlem ïoh jingbit da u Prof. P. S. Shukla ka long ka bym lah ban pdiang bad dei ban pynrem ïa ka, namar ka buh ïa ka nuksa kaba sniew ïa ka jingsynshar jong ka University ha ki sngi ki ban sa wan. Kum kine ki jingleh ym dei ban pdiang ne pynshlur,” ki la ong bad bynrap “nalor kata, u Col. Omkar Singh um shym la ai jingtip biang sha ka skulbah naduh ba la sdang ka shuti jong u bad kino kino ki jingleh, ki jingbthah, ne ki hukum ba la pynmih da u Col. Singh ki long ki bym dondor eiei bad ki bym lah satia ban pdiang da ki samla pule.”
Kine ki ar tylli ki kynhun jong ki samla pule ki la ïaiban ba kin iengskhem ha ka nongrim ba u Prof. P. S. Shukla lane u Col. Omkar Singh ym lah ban pdiang kum ki dkhot bapura jong ka skulbah.
“Ka jingñiew ba la kyntait ïa ki da ki kynhun bapher bapher bad ki dorbar shnong ha ka jylla jong ngi ka dang ïai bteng ïa kaba la ai jingkyrshan da ki samla pule jong ka skulbah bad ngi ruh ngi kheiñ ïa ki kum ki briew ba khlem akor,” la ong shuh shuh ka NEHUSU bad ka KSU.
“Ngi kyntu ba kino kino ki nonghikai kiba jied ban leh pyrshah ïa kane ka jingkyrpad bad leh pyrshah ïa ka jingsngew jong ki samla pule yn ñiew ba ki leh pyrshah ïa ka jingmyntoi bad ïa ka bha ka miat jong ki samla pule jong ka North-Eastern Hill University,” ki la bynrap shuh shuh.
