Shillong, Naitung, 31: Ka Catholic Association of Shillong (CAS) jong ka Shillong Archdiocese ha ka sngi Balang ka la pynher da ka shithi sha u Myntri Rangbah ka Jylla Chhattisgarh u Vishnu Deo Sai da kaba kyntu ba un tuklar bad ban pyllait khlem jingteh kyndon na Judicial Custody halor ka jingshah kem jong ki arngut ki riewniam Sister ka Balang Catholic na ka jylla Kerela kiba dei na ka jingïasyllok Assisi Sisters of Mary Immaculate.
Kine ki arngut ki riewniam ryngkat bad u Sukaman Mandavi ki la shah kem hadien ka jingkynshoit bad ka jingpharep da ki dkhot ka Bajrang Dal ba ki donkti ha ka jingkhaii briew bad ka jingpynkylla niam jubor.
“Ngi ka Catholic Association of Shillong (CAS), Meghalaya, ngi pynpaw ïa ka jingsngewkhia bad ka jingsngewsih halor ka jingshah kem ba dang shen jong ki arngut ki riewniam kynthei ka Balang Catholic, ka Sister Preethi Mary bad ka Sister Vandana Francis, ryngkat bad u Sukaman Mandavi, ha Durg Railway Station ha ka 26 tarik, Naitung, 2025,” la ong ka CAS ha ka shithi ba la soi da u President u Bah Vincent H. Pala, u Vice President u Bah Barnabas Nangbah bad u General Secretary u Bah H. Kharlyngdoh.
“La bat ïa ki halor ki jingkynnoh ba khlem nongrim ba ki donkti ban khaii briew bad ban pynkylla niam jubor bad ngi ngeit ba ki long tang ki jingkynnoh ki bym don nongrim bad kiba la shu pharep lamler, namarba ka kam kaba ki trei ka long ban shakri ïa ki parabriew khlem da kheiñ ïa kano kano ka jaitbynriew, ka jingngeit bad ka niam. Ngi ngeit ba ka jingshakri jong ki ïa ki para briew ka ïarap ban kyntiew ïa ka ri ba kan kiew shaphrang bad ka roi kan pa ha baroh ki liang.
“Katkum ka jingtip ba la ïoh, ki Sister kiba dei na ka jingïasyllok Assisi Sisters of Mary Immaculate ki la synran ïa ki lai ngut ki samla kynthei, kiba la palat 18 snem ka rta ryngkat ka jingmynjur na ki kmie ki kpa jong ki na ka bynta leit trei bylla jakpoh. Ngi sngewsih jur ba la pyntip ïa ka jingdonkti da ki dkhot ka Bajrang Dal kiba la kynshoit ïa kane ka jingkem khlem da sei ïa ki sakhi sabut kiba biang,” la ong ka CAS.
“Ka CAS ka pynrem jur ïa kane ka jingjia kaba long kum ka jingpynkheiñ ïa ka hok jong ka Riti Synshar jong ki jaidbynriew ritpaid ban pynpaw ka jingngeit jong ki bad ban trei ïa ki kam ha ka imlang ka sahlang khlem jingsheptieng ïa ka jingshah banbeiñ,” la bynrap shuh shuh ka CAS.
“Namarkata, da ka jingkyrpad ngi kyntu bad ïa ka ophis jong phi, ban tuklar bad ban pyllait khlem jingteh kyndon ïa ki na ka judicial custody nalor kaba ïada ïa ki hok bad ka jingshngaiñ jong ki ritpaid, khnang ban khanglad ïa ki jingthombor ha ka dur jong ka aiñ ba pyrshah ban pynkylla niam jubor. Ngi kyrpad ïa ka jingïarap mardor jong phi ban pynthikna ba ki arngut ki riewniam Sister kin lait noh kham kloi,” la kyrpad ka CAS.
