Shillong, Naitung, 03: Ka Joint Committee of Local People on Kynshi Hydro Power Project (JCLPKHPP) ka la dawa na ka Sorkar Jylla ba kan pynkloi ban pyntreikam noh ïa ka Kynshi Hydro Power Project.
Ka kynhun ka la aiti ruh da ka dorkhas ha u Myntri ka tnat Bording u AT Mondal, da kaba kyntu ruh ïa ka Sorkar ban ym pynslem shuh ban shna noh ïa kane ka projek.
U Chairman jong ka JCLPKHPP u Bah Roshem Myrthong ula ïatuh ba ka Committee kaba la ïakynduh ha ka 1 tarik mynta u bnai ha ka shnong New Majai ka la ïakren halor ki jingsahteng bad ki kam ki bym ïaid shakhmat kiba ïadei bad ka jingtei ïa ka projek.
“Ka komiti ka la pynpaw ïa ka jingsngewsih bad jingduh jingkyrmen ha kaba ïadei bad ki kam kiba sahteng bad ki bym pat pyndep na ka liang ka Sorkar da ka jingïatreilang bad ka M/s Athena Pvt Ltd ha kaba ïadei bad ka projek, ïa kaba ka komiti mynta ka kyrpad ba ïa ka kam ym dei shuh ban dang pynslem,” u la ong ha ka dorkhas.
Ka komiti ka la pan jingpynshai rh halor ka Memorandum of Understanding (MoU) ba la ïasoi hapdeng ka Sorkar Jylla bad ka M/s Athena Pvt Ltd bad kumjuh ruh ïa ki jingthmu jong ka Sorkar na ka bynta kane ka projek.
Ka komiti ka la pynpaw ïa ka jingsngewkhia halor ka jingsahteng ka kam bad ka la kyrpad ban shna pynsted noh ïa ka projek, ym ban pynslem.
Ki la ai jingmut ruh ban don ka jingïalang lang hapdeng ka Sorkar, ka kompeni, ka Joint Committee bad ki trai khyndew khnang ban pynthikna ïa ka jingsngewthuh jingmut kaba shai halor ka thong bad ki jingthmu jong ka projek.
Shuh shuh, ka Joint Committee ka la pan ïa ka kopi jong ka MoU ba la ïasoi hapdeng ka Sorkar Jylla bad ka kompeni na ka bynta ka jingbuh jingthoh.
U Bah Myrthong u la ban jur ba ka jingjop jong kane ka projek ka shong ha ka jingshimkhia jong ka Sorkar Jylla, kaba la ïalam da u Myntri Rangbah ka jylla bad u Myntri ka tnad Bording.
