Shillong, Rymphang, 21: Ka Kong Shidalin Mukhim ka kmie jong u heprit Rishan Mukhim ka la kyrpad ïa ka Sorkar ba kan kyrshan jingïarap ïa u khun jong ka uba la mynsaw ha ka jingtynrah ka trok kit clinker ïa ka School Bus jong ka Mt. Zion Higher Secondary School, 15 Mer Byrnihat, katba ka dang ap ban shaw ïa ki khynnah skul ha 17 Mer.
Kum ban shu pynkynmaw, ki la don lypa kumba 20 ngut ki khynnah skul ha ka por ba ka trok kaba kit ïa u Clinker ka la leit ban tynrah ïa kane ka School Bus ha ka por kumba 8 baje mynstep ha ka sngi 19 tarik, Rymphang, 2026.
Ki don 7 ngut ki khynnah skul kiba la mynsaw jur la pynkit noh ïa ki sha Guwahati ban ïoh jingsumar kaba kham kloi katba ïa kiba mynsaw malu mala la pynkit sha Byrnihat PHC ban ïoh jingïarap.
Ki nongïalam ka Hynniewtrep Youth Development Council (HYDC) ki la leit sngewlem ha iingsah jong u heprit Maxwelson Lyngdoh Marshyllong uba la khladnoh ha kane ka jingjia bad ha kane kajuh ka sngi ki nongïalam ka seng ki la leit jngoh ruh ïa u heprit Rishan Mukhim uba la mynsaw jur bad uba dang don hapdeng ka jingshah sumar ha ARHI hospital.
Ka Seng ka la dawa ruh ïa ka Sorkar ba ka dei ban sniew bai sumar ïa baroh ki khynnah skul kiba la mynsaw jur ha kane ka jingjia bad ban siew bai lutksan ruh ïa ka ing ka sem u heprit Maxwelson Lyngdoh Marshillong.
